Yagona interaktiv davlat xizmatlari portalidan foydalanish yoʻnalishlari

Material va uslublar
Mamlakatimizda ham axborot-kommunikatsion texnologiyalarni hamda elektron hukumat tizimini rivojlantirishga qaratilgan tadbirlarni yanada samarali hamda muvaffaqiyatli amalga oshirishga katta e’tibor qaratilmoqda. Elektron hukumat boshqaruvini rivojlantirish maqsadida Oʻzbekiston Respublikasi Vazirlar Mahkamasining 2017-yil 15-sentabrdagi “Oʻzbekiston Respublikasi yagona interaktiv davlat xizmatlari portali orqali elektron davlat xizmatlari koʻrsatish tartibini takomillashtirish chora-tadbirlari toʻgʻrisida”gi 728-sonli Qarorida yagona portalning maqsadi va vazifalari, elektron davlat xizmatlari turlari va tasnifi hamda elektron davlat xizmatlari koʻrsatish tartibi belgilab berilgan. Qarorda butunjahon internet tarmogʻida Oʻzbekiston Respublikasi yagona interaktiv davlat xizmatlari portalining yangi versiyasi ishga tushirilganligi ta’kidlangan.[1]
Mamlakatimizda yagona interaktiv davlat xizmatlari portali (YaIDXP)- my.gov.uz orqali hozirgi vaqtgacha koʻplab davlat xizmatlari samarali amalga oshirib kelinmoqda va bu mamlakat fuqarolari hamda davlat oʻrtasidagi ishonchni mustahkamlab, boshqaruvdagi shaffoflikni taʻminlamoqda. Hozirda yagona interaktiv davlat xizmatlari portalida ishga tushirilgan xizmatlar 280 taga yetgan boʻlib, jumladan, jismoniy shaxslar uchun: yashash joyiga doimiy roʻyxatga turish; nikoh toʻgʻrisidagi maʻlumotnoma; pensiya(nafaqa) haqida maʻlumotnoma; STIR olish; elektron kalit olish va yana boshqa koʻplab xizmatlar, yuridik shaxslar uchun esa: tadbirkorlar maʻlumotlari; tovarlarni elektron deklaratsiyalash; tashqi savdo kontrakti maʻlumotlarini taqdim etish hamda temir yoʻl transporti orqali olib kirilayotgan yuk haqida maʻlumot va yana bir qancha xizmat turlari mavjuddir. 2017-yilda davlat xizmatlariga yagona portaldan tushgan arizalar soni 2983 tani tashkil qilgan boʻlsa, 2021-yil yanvar-oktabr holatiga ularning soni 1 224 725 tani tashkil qilmoqda va bu soʻnggi yillarda mamlakatimizda YaIDXPdan foydalanishga boʻlgan talabning ortib borayotganini koʻrsatib beradi.[2] 2020-yilda BMTga aʻzo 193 ta davlatlarning elektron hukumatni rivojlantirish indeksi reytingi tuzib chiqildi[3] Mazkur reyting mamlakatlardagi onlayn xizmatlar koʻlami va sifati, telekomunikatsiya infratuzilmasi holatiga koʻra soʻrovnoma asosida tuzilgan boʻlib, bunda Daniya – 0,975, Janubiy Korea – 0,956 va Estoniya – 0,947 koʻrsatkichlar bilan yuqori oʻrinlarni egallab turgan boʻlsalar, Somaliya – 0,1293, Eritreya – 0,1292 va Janubiy Sudan – 0,087 koʻrsatkich bilan quyidan oʻrin olganlar. Ushbu reytingda Oʻzbekiston – 0,666 koʻrsatkich bilan 87-pogʻonadan joy olgan.[4]