Qonuni aholi bandligi to‘G‘risida

21-modda. Kredit liniyalari
Kredit liniyalari tijorat bankiga tadbirkorlik subyektlarini kreditlash uchun faqat maqsadli asosda, kredit summasini bankning balansida aks ettirgan holda ajratiladigan mablag‘lardir.
O‘zbekiston Respublikasi Bandlikka ko‘maklashish davlat jamg‘armasining mablag‘lari hisobidan kredit liniyalari tijorat banklarida keyinchalik ular tomonidan yangi ish o‘rinlari tashkil etilishini nazarda tutuvchi loyihalarni amalga oshirishga mikrokreditlar ajratish uchun ochiladi.
Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari huzuridagi yangi ish o‘rinlari tashkil etilishini rag‘batlantirish hududiy jamg‘armalari hisobidan kredit liniyalari tijorat banklarida quyidagilar uchun:
tadbirkorlik subyektlarining barqaror ish o‘rinlari tashkil etilishini, ayniqsa qishloq joylarda tashkil etilishini nazarda tutuvchi faoliyatini kredit bilan qo‘llab-quvvatlash;
mehnat resurslari ortiq darajada bo‘lgan hududlarda davlat-xususiy sheriklik shartlari asosida yangi ish o‘rinlari tashkil etilishini nazarda tutuvchi korxonalar tashkil etib, hududiy jamg‘armalarning tashkil etilgan korxonalardagi ulushini keyinchalik xususiy sheriklarga realizatsiya qilish;
Qoraqalpog‘iston Respublikasi Vazirlar Kengashi raisining, viloyatlar va Toshkent shahar hokimlarining qarorlariga binoan yangi ish o‘rinlarini tashkil etishga hamda aholi bandligini ta’minlashga qaratilgan boshqa tadbirlarni amalga oshirish uchun ochiladi.
4-bob. Ish o‘rinlarini tashkil etishga doir davlat buyurtmasi
22-modda. Ish o‘rinlarini tashkil etishga doir davlat buyurtmasini shakllantirish
Ish o‘rinlarini tashkil etishga doir davlat buyurtmasi O‘zbekiston Respublikasining investitsiya dasturiga, hududlarni kompleks rivojlantirishga doir dasturlarga va modernizatsiya qilishga doir tarmoq dasturlariga (bundan buyon matnda rivojlantirish dasturlari deb yuritiladi) kiritilgan loyihalarni amalga oshirish uchun zarur bo‘lgan ish o‘rinlari sonining davlat boshqaruvi organlari va boshqa tashkilotlar tomonidan tayyorlangan prognozi asosida shakllantiriladi.
Kelgusi yil uchun ish o‘rinlarini tashkil etishga doir davlat buyurtmasi rivojlantirishga doir dasturlarning aniq yo‘naltirilgan qismiga kiritilgan loyihalarni amalga oshirish uchun, shuningdek ishsiz shaxslarning va band bo‘lmagan shaxslarning ishga joylashtirilishini ta’minlash uchun mehnat resurslarini jalb etish ehtiyojlaridan kelib chiqqan holda shakllantiriladi.
Oldingi tahrirga qarang.
Ish o‘rinlarini tashkil etishga doir davlat buyurtmasi rivojlanish dasturlariga kiritilgan loyihalarni amalga oshirish doirasida moliyalashtirish manbalari bilan ta’minlanishi, shu jumladan O‘zbekiston Respublikasi Davlat budjeti, budjetdan tashqari jamg‘armalar mablag‘lari, jalb etilgan chet el investitsiyalari, tijorat banklarining kreditlari, tashkilotlarning o‘z mablag‘lari va qonunchilikda taqiqlanmagan boshqa manbalar hisobidan ta’minlanishi kerak.
(22-moddaning uchinchi qismi O‘zbekiston Respublikasining 2021-yil 21-apreldagi O‘RQ-683-sonli Qonuni tahririda — Qonunchilik ma’lumotlari milliy bazasi, 21.04.2021-y., 03/21/683/0375-son)