Ворислик ҳУҚУҚи амалий қўлланма Baktria press

ВОРИСЛИК ҲУҚУҚИ
54
Ўзбекистон Республикаси Олий суди Пленумининг “Суднинг ҳал 
қилув қарори ҳақида”ги 1998 йил 17 апрелдаги 13-сонли қарорининг
8-банди ҳал қилув қарорининг асослантирувчи қисмида суднинг иш 
бўйича чиқарган хулосасининг фактик ва ҳуқуқий асослари баён 
этилиши, жумладан, ҳал қилув қарорининг бу қисмида ишнинг суд 
томонидан аниқланган ҳолатлари, ишнинг ҳолатлари тўғрисидаги суд 
хулосаларига асос бўлган далиллар, суд у ёки бу далилни рад қилишда 
асосланган хулосалар, шунингдек низоли муносабатни тартибга 
солувчи моддий ҳуқуқ меъёрлари (фуқаролик, оила, ер, меҳнат, уй-
жой тўғрисидаги ва бошқа қонунлар) келтирилмоғи, қонуннинг номи, 
моддаси, банди, бошқа қонун ҳужжатларининг сони ва қабул қилинган 
санаси ҳамда процессуал ҳуқуқий меъёрлари кўрсатилмоғи, зарур 
ҳолатларда суд Ўзбекистон Республикаси Олий суди Пленумининг 
тегишли қарорларини ҳам қўллаши лозимлиги белгиланган.
Ворислик ҳуқуқи билан боғлик ишларни кўришда суд ушбу 
тоифадаги ишлар Фуқаролик кодексининг 1112–1157-моддалари 
билан тартибга солинганлигини инобатга олиб, ҳал қилув қарорининг 
асослантирувчи қисмида низога тааллуқли тегишли қонун нормасини 
кўрсатиши лозим.

---

55
Бундан ташқари, ворислик ҳуқуқи билан боғлиқ низолар юзасидан 
Олий суд Пленумининг 2011 йил 20 июлдаги “Судлар томонидан 
мерос ҳуқуқига оид қонунчиликнинг қўлланилиши тўғрисида”ги 5-сонли 
қарорида ҳам судларга тегишли тушунтиришлар берилган. 
Шунинг учун суд ворислик ҳуқуқи билан боғлик низолар юзасидан 
чиқарилган ҳал қилув қарорининг асослантирувчи қисмида ўз 
хулосасини асослантириш мақсадида нафақат моддий ва процессуал 
ҳуқуқ нормаларига, балки юқорида кўрсатилган Пленум қарорларининг 
тушунтиришларига ҳам ҳавола қилиб, аниқланган ҳолатларни 
(мерос таркиби, меросхўрлар таркиби, қонун ёки васиятнома бўйича 
ворислик, мажбурий улуш, тақдим қилиш ҳуқуқи бўйича ворислик, 
мерос трансмиссияси тартибида ворислик ва ҳ.к.), суд хулосасига 
асос бўлган далилларни, у ёки бу далилни рад қилиш асосларини 
кўрсатиши лозим.
Бундан ташқари мазкур фуқаролик ишларини кўришда суд даъво 
аризасида тарафлар сифатида кўрсатилган ёки кўрсатилмаганлигидан 
қатъи назар барча меросхўрларни ишга жалб қилиши лозим.
Бу шахслар мустақил талаблар билан арз қилмайдиган учинчи 
шахслар сифатида ишга жалб қилиниб, ҳал қилув қарорининг баён 
қисмида уларнинг тушунтиришлари кўрсатилиши керак.

---