Urganch davlat universiteti turizm va iqtisodiyot fakulteti turizm va mehmonxona xo

4-MAVZU. TURIZM XIZMATLAR BOZORINING IQTISODIYOTNING BOSHQA TARMOQLARI BILAN BO‘LGAN ALOQALARINI HISOBGA OLISH.

Reja:

1. 
   Faoliyat turlarining xalqaro standart tasnifi (SIKTA)haqida tushuncha berish.
   
2. 
   Turizm tashqi bozor kon’yukturasining asosiy xususiyatlarini o‘rganish.
   
3. 
   Turizm xizmatlar bozorining iqtisodiyotning boshqa tarmoqlari bilan bo‘lgan aloqalarini hisobga olish.
   

Butunjahon turistik tashkilot (BTT) tahliliga asosan, turizm sohasida xo‘jalik yurituvchi sub’ektlarning faoliyati milliy iqtisodiyotning 32 ta tarmog‘i bilan chambarchas bog‘liq bo‘lib, ularning rivojlanishiga ta’sir o‘tkazadi.

Turizm bozorida turistlarga xizmatlar va tovarlarni taklif etish jarayonida tarmoqlarning o‘zaro munosabatlaridagi murakkablik turistik industriyaga tegishli bo‘lgan faoliyatlarni aniqlab olish uchun qiyinchilik yaratadi. Bu borada Butunjahon turistik tashkilot (BTT) tomonidan ishlab chiqilgan va 1993 yilda Birlashgan millatlar tashkiloti (BMT) Statistik komissiyasi tomonidan qabul qilingan “Turizm sohasida amalga oshiriladigan faoliyat turlarining Xalqaro standartlar tavsifi” (SIKTA) eng istiqbolli hisoblanadi.

Uni yaratish va qo‘llashdan maqsad turizm haqidagi aniq ma’lumotlarni yig‘ish, qayta ishlash va tarqatishning metodologik asosini ta’minlashdir. Bunda ma’lumotlar qamrovining to‘laligi (reprezentativligi), milliy hisoblar tizimiga turizmdagi iqtisodiy faoliyat turlari tasnifining yagona tamoyillarini qo‘llash, ma’lumotning mamlakatshunoslik jihatidan qiyoslanishi, to‘lov balansi hisoblarining haqqoniyligini aniqlashda turizmning Xalqaro savdo rivojlanishiga qo‘shgan hissasini joriy qilish muammolari hal etiladi¹³.

Murakkab guruhlashtirish asosida turizm sohasida omalga oshiriladigan faoliyat turlarining Xalqaro standartlar tasnifida ko‘rsatilgan turizm industriyasi tuzilishi bilan tanishtiradi va shu bilan birga uning tarkibiga kiradigan sohalarning o‘zaro uzviy munosabatlarini hamda ularning turistlar umumiy sarf-harajatlari tarkibidagi ulushini alohida ko‘rsatib o‘tadi. SIKTA turizm bilan bevosita yoki bilvosita bog‘liq bo‘lgan faoliyat turlarining xilma-xilligini tartibga solish muammosini hal etishga yordam beradi.