Urganch – 2020 O‘zbekiston respublikasi oliy va o‘rta maxsus ta’lim vazirligi urganch davlat universiteti pedagogika fakulteti

MIRZO ULUG‘BEKNING PEDAGOGIK G‘OYALARI VA TA’LIM RIVOJIDAGI XIZMATLARI.
Reja:
1.XIV-XVI asrlarda fan, madaniyat, ma’rifat, maorif taraqqiyoti.
2. Amir Temur va uning yetuk inson tarbiyasiga oid qarashlari.
3. Ulug’bekning fan, madaniyat, ma’rifat taraqqiyotidagi xizmati, ilmiy merosi.
4. Temuriylar sulolasining ilm-ma’rifat taraqqiyotidagi o’rni.
5. Zahiriddin Muhammad Boburning ma’rifiy-axloqiy qarashlari.
6. «Boburnoma» asarining ta’limiy — tarbiyaviy ahamiyati.
Yodlab oling!
Bizkim — mulki Turon, Amiri Turkistonmiz. Bizkim — millatlarning eng qadimi va eng ulug’i — Turkning bosh bo’g’inimiz. Amir Temur

Ma’rifatli Movarounnahr ruhi, Samarqand, Toshkent, Buxoro, Xiva, Shahrisabz, Termizning noyob tarixiy yodgorliklari, buyuk Ipak yo’li, Sharq mutafakkirlari yaratgan bebaho ta’limotlar, Amir Temur va Temuriylar davrida gullab-yashnagan ilm-fan, me’morchilik, tasviriy san’at, naqqoshlik, musiqa, rivojlangan savdo-iqtisodiy munosabatlar, barpo etilgan mustahkam qudratli davlat, uning ichki va tashqi siyosati Yevropadagi Uyg’onish jarayoniga hayotbaxsh ta’sir etgani tarixiy haqiqatdir.

Ilm-fan, madaniyat, me’morchilik va boshqa sohalarda o’sha kezlarda erishilgan ulkan muvaffaqiyatlar o’z ulug’vorligi, nafisligi, umum-bashariy g’oyalarga boyligi, badiiy shakllarining xilma- xilligi, ma’naviy sofligi va etukligi bilan inson aql-idroki va tafakkurini yuksaklikka ko’tardi, umuminsoniyat qalbiga yetib bordi, G’arbni Sharq bilan yaqinlashtirdi.
Shu jihatlarni ko’zda tutib, tadqiqotchilar bu davrlarni diyorimizning oltin asri, ikkinchi Renesans — Sharq Uyg’onish davn deb nomlaydilar. «Temuriylar davri haqiqatdan ham ilm-fan, madaniyat va maorifning behad ravnaq topishini ta’minlagan sharq Uyg’onish davri edi»³ .
XIV asrning ikkinchi yarmidan XVI asrning boshlarigacha bo’lgan Uyg’onish davri - madaniy yuksalish birinchi navbatda Amir Temur nomi va faoliyati bilan uzviy bog’liq bo’lsa, ikkinchidan bu sohada farzandlari, avlodlari ham katta o’rin tutganlar.
Amir Temur Ko’ragon ibn Amir Tarag’ay 1336 yilning 9 aprelida o’sha paytda Kesh (Shahrisabz)ga qarashli Xo’jailg’or qishlogida tavallud topgan.
Sohibqiron bobomiz jahonda qudratli va gullab-yashnagan davlat barpo etgan, bepoyon mamlakatni ijtimoiy adolat va qonunchilik asosida boshqarishni yo’lga qo’ygan buyuk davlat arbobi sifatida ham tarixda ulug’lanadigan mo’tabar zotdir. Shaxsan uning o’zi odob-ahloq, iymon-e’tiqod, madaniyat, ma’rifat, ma’naviyat, ijtimoiy adolat bobida yuksaklikka, mukamallikka erishgan siymodir. Uning davlati yuksak ma’naviyat va oliy darajadagi madaniyatga yo’g’rilgan saltanat edi.
Eslab qoling!



Temur bilim olishni yetti yoshidan boshlagan. 9 yoshidan namoz o’qigan. 12 yoshida madrasadagi barcha o’quvchilardan ustun bo’lgan.

Eslab qoling!

Ta’lim-tarbiya va ilm-fanga buyuk hissa qo’shgan Amir Temurning farzandlari, nabiralari, avlodlari: Jahongir Umarshayx Mirzo, Mironshoh Mirzo, Shohruh Mirzo, Mirzo Ulug’bek, Zahiriddin Muhammad Bobur, Sulton Xusayn Bayqaro, Xumoyun Mirzo, Komron Mirzo, Hindol Mirzo, Gulbadanbegim va boshqalardir.