Umumiy o‘rta ta‘lim muassasalarida Aqliy rivojlanishida muammolari bo‘lgan bolalar uchun tashkil etiladigan korreksion sinflar uchun tayanch o‘quv dasturlari

Savod o‘rgatish va nutq o‘stirish
(128 soat)
I. Boʻlim. Tayyorgarlik davri
(23 soat)
1. Tayyorgarlik davrida o‘qish darslari (13 soat). Dastlabki so‘z boyligi, nutqiy imkoniyatlarini shakllantirish, narsalarni nomlash, ularni guruhlarga bo‘lish, rangi, shakli, xususiyati haqida tushuncha hosil qilish. Atrofdagi narsalar, ular orqali amalga oshiriladigan harakatlar, bajariladigan ishlarni so‘zlarda ifodalash.
Ovoz va nutqiy nafasni me’yorda qo‘llash kabi dastlabki ko‘nikmalarni shakllantirib, rivojlantirib borish.
O‘quv predmeti mazmuni asosida tashkil etiladigan dars haqidagi amaliy ko‘nikma, darsning muayyan vaqt oralig‘ida davom etishi, rasm mazmunini anglash, rasm mazmuni asosida mantiqiy izchillikka ega bo‘lgan 2, 3 ta gapdan iborat matn tuzish, darslik bilan ishlash, harflarning bosma va yozma, bosh
va kichik harflar bilan tanishtirish.
Og‘zaki va yozma nutq haqida tushuncha; gap haqida tushuncha, so‘z
va bo‘g‘in haqida tushuncha, gap, so‘z, bo‘g‘in va tovush uzviyligi, unli va undosh tovush haqida tushuncha, maktab partasida to‘g‘ri o‘tirish, darslikdan foydalanishga oid ilk o‘quv ko‘nikmalarini shakllantirish.
2. Tayyorgarlik davrida yozuv darslari (10 soat). Yozuv darslari o‘qish darslari bilan uzviy bog‘langan holda olib boriladi. Tayyorgarlik davri yozuv darslarida o‘quvchi yozuv daftaridan to‘g‘ri foydalanish, parta ustiga daftarni to‘g‘ri qo‘yish yozuv daftari bilan o‘quvchi oralig‘ida muayyan masofani saqlash (35 sm); yozuv qurollaridan to‘g‘ri foydalanish, yozayotganda gavdani to‘g‘ri tutish va tirsaklarni to‘g‘ri harakat qildirish, avval qalam bilan ishlab qo‘l
va barmoqlar motorikasini moslashtirgan holda rasmlar ustidan yurgizish, chiziqdan chiqmasdan berilgan rasmlarni bo‘yash; yozuv elementlarini to‘g‘ri idrok etish (qayerdan boshlash, qayerda to‘xtash, o‘ngga, chapga burish, yoza boshlash, qo‘l harakatini uzmay yozish).
II. Boʻlim. Alifbe davri
(112 soat)
1. O‘qishga o‘rgatish (56 soat). Unli va undosh tovushlar, ularning talaffuzidagi farqlanish haqida ma’lumot berish; Har bir harfning talaffuzidagi artikulatsion ko‘rinishi, ovozning ishtiroki eshitish, ko‘rish va taqlid qilib talaffuz qilish; harf va tovush munosabatiga oid tushunchalar bilan o‘quvchilarni tanishtirish; kesma harf va bo‘g‘inlar asosida so‘z hosil qilish, tuzilgan so‘zlarni to‘g‘ri o‘qish; so‘zlarni avval bo‘g‘inlab, ravon o‘qishga o‘rgatish; taqqoslash
va chamalash qobiliyatlarini o‘stirish; tinish belgilariga rioya qilib, ifodali o‘qishga o‘rgatish; o‘qish jarayonida amal qilinishi lozim bo‘lgan gigiyena qoidalariga rioya qilishga o‘rgatish.