Umumiy o‘rta ta’lim maktablari o‘qituvchilari o‘rtasida

6-bob. Musobaqani moliyalashtirish

16. Musobaqani tashkillashtirish, ishtirokchilarni joylashtirish, ovqatlantirish, transport vositasi, 1-3-o‘rinni egallagan umumjamoalar uchun kuboklar, diplom, medal va esdalik sovg‘alari bilan taqdirlash xarajatlari O‘zbekiston “Yoshlik” jismoniy tarbiya va sport jamiyati Markaziy kengashi tomonidan amalga oshiriladi.

17. Ishtirokchilarning musobaqa o‘tkazilishi belgilangan manzilgacha bo‘lgan yo‘l kira va yo‘lda ovqatlanish xarajatlari O‘zbekiston “Yoshlik” jismoniy tarbiya va sport jamiyati Markaziy kengashi tomonidan qoplanadi.


7-bob. Musobaqani o‘tkazish tartibi va g‘oliblarni aniqlash

18. Musobaqalar har bir jamoaning o‘zaro uchrashuvlar (aylanma tizim) tarzida o‘tkaziladi.

19. Musobaqa g‘oliblari Dasturga kiritilgan o‘yinlar, estafetalar, konkurslarga berilgan ochkolar yig‘indisiga qarab quyidagicha aniqlanadi:
har bir o‘yin, estafetani bexato yakunlab marraga birinchi bo‘lib yetib kelgan jamoaga 3 ochko;
ikkinchi bo‘lib marraga yetib kelgan jamoaga 1 ochko;
mashqlarni bexato bajarib, marraga teng vaqtda kelgan jamoalarga 2 ochkodan;
yakka (konkurs) bellashuvlar g‘oliblariga 1 ochko beriladi, mag‘lubga esa ochko berilmaydi.
20. Musobaqada 2 ta jamoa bir xil natijani qo‘lga kiritgan taqdirda ular o‘rtasidagi o‘zaro uchrashuv natijalariga qarab g‘olib jamoalar aniqlanadi. Agar 3 ta jamoa bir xil natijani qo‘lga kiritsa, bunday hollarda sardorlar bahsi orqali g‘olib jamoa aniqlanadi.
21. G‘olib jamoalarni aniqlash hakamlar xay’ati zimmasiga yuklatiladi.
22. Musobaqada:
musobaqa estafetasi, o‘yinlari Dasturda belgilanganidek bajarilishi shart;
o‘yin vaqtida har bir ishtirokchi tomonidan shartning bajarilishiga hakamlar tomonidan alohida e’tibor beriladi va ishtirokchi tomonidan bajarilgan mashqlarda xatolik bo‘lsa, ishtirokchining o‘zi tomonidan tuzatilishi shart. Agar to‘g‘rilanmasa, hakamlar bayonnomasiga bitta xato belgisi (I) qo‘yiladi;
ishtirokchilar tomonidan bir shartning o‘zida ikki va undan ko‘p xatoliklarga yo‘l qo‘yilsa, har bir xatosi belgilanib boriladi. Ushbu xatolarning har 3 tasi uchun 1 ochko olib tashlanadi;
ishtirokchilar tomonidan yo‘l qo‘yilgan xatolar orqali shart birinchi bajarilsa, ularning bu shartni birinchi bajarganliklari bekor qilinadi va shart g‘olibligi shartni bexato bajargan raqib jamoaga beriladi;
agar ikkala jamoa ishtirokchilari shartni xatoliklar bilan bajarishsa, bu holda hakamlar tomonidan qo‘yilgan belgilar hisobiga ko‘ra xatosi kam jamoaga shart g‘olibligi beriladi va g‘olib jamoa 1 ochko, mag‘lub jamoaga esa ochko berilmaydi;
musobaqani o‘tkazish jarayonida hakamlarga xalaqit bergan (jamoa vakillari, jamoa muxlislari tomonidan) jamoa to‘plagan ochkolaridan 3 ochko olib tashlanadi;
agar jamoa a’zolari qo‘pol xatoga yo‘l qo‘ysa, sariq kartochka bilan ogohlantiriladi va jamoadan 1 ochko olib tashlanadi yoki qizil kartochka ko‘rsatilib, murabbiy maydondan chetlashtiriladi va jamoadan 3 ochko olib tashlanadi.
23. Musobaqada jamoalar uchrashuvlaridan bir kun oldin jamoa vakillari, o‘qituvchilari va hakamlar ishtirokida, Tashkiliy qo‘mita tomonidan taqdim etilgan o‘yinlar variantlari yopiq holatda tanlanib, tanlangan o‘yinlar bo‘yicha jamoalar bellashadilar.
24. Har bir o‘yin 8 ta shartdan iborat bo‘ladi. Jamoalar tomonidan to‘plangan ochkolar teng bo‘lgan taqdirda sardorlar bahsi orqali g‘olib jamoa aniqlanadi.