Уларни олий ўқув юртларига грантларга ўқишга кириб, ажойиб касбларнинг устаси, энг зўри бўлмоқликни насиб қилгин!

Аъузу биллаҳи минаш шайтонир рожийм.Бисмиллаҳир раҳмонир роҳийм. Илаҳа омийн! Аллоҳим, эй бор худоё, эй яратган эгам, токи парвардигор, ўзинг бизни яратганингга, бераётган ризқ-насибанг учун барча ҳамду санолар фақат сенга бўлсин! Пайғамбаримиз Муҳаммад саллоллоҳу алайҳи васалламга дуруду-саловотлар бўлсин!
Аллоҳим, ота-онамни, бобокалон-момокалонларимни, ўтган қариндошларимни, дуоларимиздан умидвор бўлиб турганларни ўз раҳматингга олгин, уларнинг билиб-билмай хато-гуноҳларини ўзинг кечиргин, ғариқу -раҳмат, оҳистайи-жаннат қилгин, қабрларини қуръон нурлари ила пиру-мунаввар айлагин!
Аллоҳим, ўзинг Ар-Раҳиймдирсан, билиб билмай қилган хато гуноҳларимизни ўзинг махфират айлагил, қалбларимизни ҳидоят нури ила мунаввар айлагил, шу касбу-корларимиз ила икки дунё бахт-саодатига мушарраф айлагил!
Аллоҳим, ўзинг барчамизни, жумладан, фарзандларимни, невараю-чевараларимни, келину куёвларимни, барча қариндош-уруғларимни ҳар қандай балою-қазолардан, офат касалликлардан, касофатлардан, шайтоннинг васвасаларидан, кўз тегишидан, Дажжолнинг фитналаридан, ўт балосидан, сув балосидан, қуруқ туҳматдан, бевақт ўлимдан ўз паноҳингда сақлагин!
Фарзандларимни, невараю-чевараларимни иймонли, эътиқодли, инсофли, диёнатли, намозхон, тақводор, Ватанга, дину Исломга хизмат қиладиган, биз ота-оналарига меҳр-оқибатли, садоқатли, беш вақт намозда бўладиган, олиму-қурро, закот фарзини амалга оширадиган, ақлли, фаросатли, келажаги буюк, солиҳ-солиҳа фарзандлардан бўлмоқлигини насиб қилгин!
Уларни олий ўқув юртларига грантларга ўқишга кириб, ажойиб касбларнинг устаси, энг зўри бўлмоқликни насиб қилгин!
Невараю-чевараларимга иймонли яхши келин, яхши куёв, яхши қуда-андалардан насиб қилгин! Уларнинг келажагини, яхши кунларини кўриб уларнинг дуогўйи бўлиб юрмоқлигимизни насиб қилгин!
Аллоҳим, бизларнинг қабрдаги савол-жавобимизни осон қилгин, иймонимизни басаломат қилгин, қиёмат куни юзимизни ёруғ қилгин, сирот кўприкларидан яшин тезлигида ўтадиган бандаларингдан қилгин, номаю-аъмолларимизни ўнг томонимиздан бергин, асло чап томонимиздан бермагин, Пайғамбаримиз шафоатларига мушарраф бўлиб фирдавс жаннатларида Пайғамбаримиз саллоллоҳу алайҳи васаллам билан қўшни бўлмоқликни насиб қилгин, энг олий бахт - сенинг ҳусну-жамолингни кўрмоқликни насиб қилгин!
Аллоҳим, ўзинг барчаларимизга куч-қувват, сабр-бардош, ақл-заковат, зеҳн, зийраклик, ғайрат-шижоат, ғойибингдан, ҳалол ризқингдан мўл-кўл қилиб, чиройли кексаймоқликни насиб қилгин!
Аразлашиб юрганларнинг орасини ўзинг ислоҳ қилгин, уларга инсофу тавфиқ бергин, уларнинг орасидаги адоватни йўқ қилиб бир-бирларига меҳр-муҳаббатли қилгин! Беш фарздан бири бўлган Ҳаж зиёратини амалга оширмоқликни барча авлодимга насиб қилгин! Мусофирчиликда ишлаб юрган фарзанду-невараларимни ўз паноҳингда сақлагил, ризқини мўл қилгин, мартабаларини улуғ қилгин!
Аллоҳим ўзинг юртимизга, хонадонларимизга тинчлик, осойишталик, файзу-барокат, тўкин-сочинчиликни насиб қилгин! Роббана атина фиддунйа хасанатан ва фил ахироти хасанатан ва қина ъазабан-нар. Аллоҳу акбар!