Учебное пособие по предмету «Каракалпакский язык» написано и утверждено на основе учебного плана и рабочей программы. Учебное пособие предназначено для студентов высших учебных заведений, обучающихся по специальности на узбекском языке

35.2. Tekstte berilgen tuwra gáplerdi ózlestirilgen gápke aylandırıp jazıń.
Ustazlar
Bul dúnyada hár qanday aqıllı insan – qay jerde islemesin, qanday kásip, lawazım iyesi bolmasın, oǵan bilim – tárbiya berip, ómirge jollaǵan ustaz hám tárbiyashılar aldında hámiyshe qarızdarlıq sezimi menen jasaydı.
Haqıyqatında da, óziniń kóz nurı, qálbin, pútin barlıǵın baǵıshlap, bárshemizge sabaq bergen atańday teberik, anańday mehriban, siz, áziz ustazlardı hesh nárse menen ólshep, bahalap bolmaytuǵın mashaqatlı hám sharapatlı miynetińiz ushın qanday minnetdarlıq aytsaq ta arzıydı!
35.3. Teksttegi tuwra gáplerdi ózlestirilgen gápke aylandırıń.
- «Men bul keń álemdi kewlime sıydırıp jasadım. Lekin, bul keń álemge ózim sıymadım» – degen eken diywanayı Mashrab.
- «Men ólgen soń sadaqa bermeń, kózimniń tiriliginde ash – arıqqa ózim kóp sadaqa berim» – degen eken Maqtumqulı.
- «Eliniń awırmanlıǵın iynine kóterip, az quwanıp, kóp qıynalǵıń kelse, shayır bol» – degen eken Berdaq.
- Meniń ómir jolım – xalqımnıń ómir jolı, xalqımnıń ómir jolı – meniń ómir jolım, – degen eken Jiyen jıraw.
Bir jola Shımbay qalasınıń hákimi gileń jas shayırlardıń jarısın ótkeripti. Hámmesinikinen jas Berdaq shayırdıń qosıqları aǵla shıǵıp, Hákim oǵan bes tilla sıylıq inam etipti. Ómirinde bunsha kóp pul uslap kórmegen jas shayır esikten shıǵıwǵa meyillengende, qos jasawıl, alba – dulba ústinen balıqtıń iyisi múńkigen bir kisiniń ántek – tántegin shıǵarıp qala hákiminiń aldına ákeledi.
- Qalamızdıń ullı hákimi, – depti jasawıllardıń biri: - «Mınaw kisi sol Aral teńizinen balıq tutıp qalaǵa arqalap ákelip satatuǵın edi, búgin balıǵın siz belgilegen nırıqtan qımbatıraq sattı» .
- «Toǵız dúrre urılsın!» – depti hákim oylanbastan.
- Ullı Shımbaydıń ullı hákimi, sál gidirińiz, – depti jas Berdaq. – Siz házir meniń qosıqlarımdı unatıp bes tilla sıylıq berdińiz. Al mınaw balıqshı kisi meniń ákem Ǵarǵabay boladı.
Eger, ol balıq awlap satıp meni oqıtpaǵanda, men búgin sizdi maqtaytuǵın shayır dárejesine jetpegen bolar edim. Sol ushın meniń ákem Ǵarǵabaydı emes, onı oqıtpay ash balıqshı halında qaldırǵan ákesin tawıp jazalańız» – depti.
- «Áh Berdaq, tilińe sáddaq! Saǵan usınday tildi bergen anańa rahmet! – dep, qala hákimi jasawıllarǵa:
- Shayırdıń ákesin házir bosatıp, iynine pashshayı shapan jabıńlar», – dep buyırıptı.