Тура акадан

ШАҲАР ВА ТУМАН ТЕРИ-ТАНОСИЛ КАСАЛЛИКЛАРИ ДИСПАНСЕРЛАРИ ҲАҚИДАГИ НИЗОМ


1. УМУМИЙ ҲОЛАТЛАР
1. Шаҳар ва туман тери-таносил касалликлари диспансерлари (Кейинги ўринларда шаҳар, туман ТТКД) соғлиқни сақлаш вазирлиги тизимининг мустақил муассасалари бўлиб, хизмат кўрсатилаётган ҳудуддаги республика аҳолисига дерматология ва венерология бўйича ихтисослаштирилган тиббий ёрдам кўрсатишга мўлжалланган.
2. ТТКД фаолияти Ўзбекистон Республикаси қонунлари, Ўзбекистон Республикаси Соғлиқни сақлаш вазирлигининг буйруқлари ва бошқа норматив-ҳужжатлари, давлат ҳокимияти органлари ва соғлиқни сақлаш бошқармасининг юқори турувчи органлари ҳамда мазкур низом асосида тартибга солинади.
3. Шаҳар ёки туман ТТКД бевосита соғлиқни сақлаш бошқармаси ва юқори ташкилотларига бўйсинади.
4. ТТКД фаолиятини бошқаришни соғлиқни сақлаш бошқармаси раҳбари ҳамда амалдаги қонунчиликка мувофиқ тайинланадиган ва озод қилинадиган бош шифокор амалга оширади. Бош шифокор ТТКД ишини ташкил қилади, унинг натижалари учун жавобгар бўлади, ТТКД вазифаларидан келиб чиқиб, ходимлар учун лавозим йўриқномаларини тасдиқлайди.
5. ТТКД мустақил хўжалик юритувчи субъект бўлиб, юридик шахс ҳуқуқларига эга, оператив бошқарувида алоҳида мол-мулкига, мустақил балансига, банк муассасаларидаги ўзининг барча турдаги ҳисоб рақамларига, муҳрига, ўз номи туширилган бланкларга ҳамда ўз фаолияти учун зарур бўлган бошқа ҳужжатларга эга бўлади..
6. ТТКД низоми унинг мақсад ва вазифаларини, бошқарув тузилмасини, молиялаштириш ва мол-мулкдан фойдаланиш тартибини, унинг ҳуқуқ ва мажбуриятларини, ҳисоб ва ҳисоботи шаклларини ва фаолиятга доир бошқа масалаларни белгилайди. ТТКД низоми маҳаллий шароитларни ҳисобга олган ҳолда ишлаб чиқилади.
7. ТТКД қуввати хизмат кўрсатилаётган (бириктирилган) аҳоли қатламларининг таркиби ва сони билан белгиланади.
8. Шаҳар ёки туман ТТКД қонунчиликда белгиланган шаклларда ва муддатларда ўз иши ҳисобини юритади ва ҳисоботларни топширади.