Toshkent tibbiyot akademiyasi tibbiy pedagogika fakulteti

1.O‘quv modulining dolzarbligi va oliy ta’limdagi o‘rni

Psixologiya va pedagogika moduli dasturi tibbiy ta’lim 1- kurs bakalavriat yo‘nalishi o‘quv rejasining umumkasbiy modullar qatoriga taalluqli bo‘lib psixologik va pedagogik bilimlarni o‘rgatadi. Psixologiya va pedagogika moduli bo‘lajak mutaxassisni tayyorlashda talabalarga tibbiyotda psixologik va pedagogik bilimlarning o‘rni va ahamiyati, psixologiya va pedagogikada shaxs muammosi, shaxs faoliyati va uning individual-psixologik xususiyatlari, psixik bilish jarayonlari, emotsional-irodaviy holatlari, shaxslararo munosabatlar, guruh psixologiyasi, ta’lim va tarbiya jarayonining mazmun va mohiyatini kompleks o‘rgatishga qaratilgan.

Modulni o‘qitish uchun oila psixologiyasi, biologiya, tarix kabi fanlar nazariy zamin bo‘lib xizmat qiladi. Psixologiya va pedagogika moduli keyinchalik tibbiyot psixologiyasi, psixiatriya, fiziologiya kabi modullarni o‘qitish uchun nazariy zamin bo‘lib xizmat qiladi.