Toshkent moliya instituti m. Y. Raximov, N. N. Kalandarova moliyaviy tahlil

Pul mablag‘larining omilli tahlili

Moliyaviy koeffitsiyent lar	Hisob-kitoblar	Jami o‘zgarish	Omillar ta’siri
			1-omil	2-omil
1. Sof pul oqimining yetarliligi			Pul mablag‘lari kirimining o‘zgarishi	Pul mablag‘lari chiqimining o‘zgarishi
O‘tgan yil	Kpm0 = PMk0 / PMch0 * 100%	Kpm1-Kpm0	Kpm1,0-Kpm0	Kpm1-Kpm1,0
Hisobot yil shartli	Kpm1,0 = PMk1 / PMch0 * 100%
Hisobot yili	Kpm1 = PMk1 / PMch1 * 100%
2. Olingan pul mablag‘larining rentabelligi			Moliyaviy natijalarning o‘zgarishi	Pul mablag‘lari kirimining o‘zgarishi
O‘tgan yil	Rpmk0 = F0 / PMk0 * 100%	Rpmk1-Rpmk0	Rpmk1,0-Rpmk0	Rpmk1-Rpmk1,0
Hisobot yil shartli	Rpmk1,0 = F1 / PMk0 * 100%
Hisobot yili	Rpmk1 = F1 / PMk1 * 100%
3. Sarflangan pul mablag‘larining rentabelligi			Moliyaviy natijalarning o‘zgarishi	Pul mablag‘lari chiqimining o‘zgarishi
O‘tgan yil	Rpmch0 = F0 / PMch0 * 100%	Rpmch1-Rpmch0	Rpmch1,0-Rpmch0	Rpmch1-Rpmch1,0
Hisobot yil shartli	Rpmch1,0 = F1 / PMch0 * 100%
Hisobot yili	Rpmch1 = F1 / PMch1 * 100%
4.O‘rtacha pul qoldig‘ining rentabelligi			Moliyaviy natijalar ning o‘zgarishi	Pul mablag‘lari o‘rtacha qoldig‘ini o‘zgarishi
O‘tgan yil	Rpmq0 = F0 / PMq0 * 100%	Rpmq1-Rpmq0	Rpmq1,0-Rpmq0	Rpmq1-Rpmq1,0
Hisobot yil shartli	Rpmq1,0 = F1 / PMq0 * 100%
Hisobot yili	Rpmq1 = F1 / PMq1 * 100%

10.8. Pulning muddatdagi qiymati, foiz stavkalari va ularni hisoblash usullari

Pul mablag‘larini muddatdagi qiymatini aniqlash diskontlashni talab etadi. Bu jarayonga juda ko‘p omillar ta’sir qiladi: inflyatsiya, risklar, likvidlik va h.k.

Pul mablag‘larining muddatdagi qiymatini aniqlash investorlarga pul mablag‘larini joylashtirishning samaradorligi va natijaviyligini baholashga imkon beradi. Naqd pul oqimining kelajakdagi qiymatini aniqlashning asosiy kamchiligi uning noaniqligidir. Lekin bu noaniqlik riskini aniq hisob-kitoblar va taxminlar asosida kamaytirish mumkin.
Pulning muddatdagi qiymati baholangan kelgusi pul oqimlarini diskontlash orqali inobatga olinishi sababli, ushbu pul oqimlari moliyalashtirish faoliyatlari bo‘yicha pul kirimlari yoki chiqimlarini o‘z ichiga olmaydi. Xuddi shuningdek, diskont stavkasi soliqdan oldingi asosda aniqlanishi tufayli, kelgusi pul oqimlari ham soliqdan oldingi asosda aniqlanadi.
Pulning joriy qiymatining kelgusida qanday daromad keltirishini quyidagi formula asosida hisoblash mumkin.

Bu yerda:
PV – pul oqimining joriy qiymati (bugungi pul mablag‘lari summasi);
i – foiz stavkasi;
N – davrlar soni.
Quyida, 1 500,0 mln.so‘m 5 yilga, 7.5 %li stavkada investitsiya qilinishi, depozitga qo‘yilishi qancha daromad olib kelishini hisob-kitob qilishimiz mumkin.

Pulning kelgusi qiymati hisob-kitobi

Davr	Belgi	Pulning kelgusi qiymati, mln so‘m
Dastlabki pul	FV0	1 500,0
Birinchi yili	FV1	1 500.0 * (1+0,075)^1=1 612,50
Ikkinchi yili	FV2	1 612,50 * (1+0,075)^1=1 733,44
Uchinchi yili	FV3	1 733,44 * (1+0,075)^1=1 863,45
To‘rtinchi yili	FV4	1 863,45 * (1+0,075)^1=2 003,20
Beshinchi yili	FV5	2 003,20 * (1+0,075)^1=2 153,44

FV=1500*(1+0,075)⁵=2153,44 mlnso‘m


Demak, korxona tomonidan 1 500.0 mln so‘m mablag‘ 5 yildan keyin 2 153.44 mln so‘mga aylanadi.
Xo‘jalik yurituvchi subyekt aktivning foydalanishdagi qiymatini baholash uchun qaysi yondashuvni tanlashidan qat’iy nazar, pul oqimlarini diskontlashda foydalaniladigan foiz stavkalari baholangan pul oqimlari to‘g‘rilangan risklarni aks ettirmasligi zarur⁷⁴.
Diskont stavkasi xo‘jalik yurituvchi subyektning kapital tuzilishidan va xo‘jalik yurituvchi subyekt aktivni sotib olishni moliyalashtirgan usuldan mustaqildir, chunki aktivdan yuzaga kelishi kutilgan kelgusi pul oqimlari xo‘jalik yurituvchi subyekt aktivni sotib olishni moliyalashtirgan usulga bog‘liq emas.

10.9. Valyuta mablag‘lari harakatining tahlili

Keyingi yillarda valyuta siyosati va tashqi savdo faoliyati sohasini takomillashtirish bo‘yicha ko‘rilgan chora-tadbirlar mamlakatimiz iqtisodiyotiga xorijiy investitsiyalarni jalb qilish, eksport salohiyatini oshirish, zamonaviy, eksportga yo‘naltirilgan ishlab chiqarishlarni hamda kichik biznes va xususiy xo‘jalik yurituvchi subyektlarni barqaror rivojlantirishga xizmat qilmoqda.

Maqbul miqdorda tashqi qarzlarni jalb qilish bo‘yicha izchil amalga oshirilayotgan siyosat O‘zbekistonning majburiyatlarini o‘z vaqtida bajaradigan ishonchli, to‘lovga layoqatli xalqaro sherik sifatidagi imidjini ta’minladi, keyinchalik valyuta kursini liberallashtirish uchun zarur oltin-valyuta zaxirasini shakllantirish, valyuta resurslarini real iqtisodiyotning yetakchi tarmoqlarini modernizatsiya qilish, texnik qayta jihozlash va diversifikatsiya qilishning ustuvor sohalariga yo‘naltirish, jahon moliyaviy inqirozining salbiy oqibatlarini yumshatish imkonini bermoqda.
2017-2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasida ham valyuta sohasini tartibga solishning bozor mexanizmlarini joriy qilish, respublika eksport salohiyatini oshirishni rag‘batlantirish, to‘g‘ridan-to‘g‘ri xorijiy investitsiyalarni faol jalb qilish, mahalliy ishlab chiqaruvchilarning tashqi va ichki bozordagi raqobatdoshligini oshirish, mamlakatimizda investitsiya va ishbilarmonlik muhitini yaxshilash, valyuta bozorini yanada liberallashtirishga muhim ahamiyat qaratilgan va uning asosiy yo‘nalishlari belgilab berilgan.
O‘zbekiston Respublikasining “Valyutani tartibga solish to‘g‘risida”gi qonunining 3-moddasiga muvofiq “Valyuta boyliklari” qatoriga quyidagilar kiradi:
- chet el valyutasi;
- qimmatli qog‘ozlar – chet el valyutasidagi fond boyliklari (aksiyalar, obligatsiyalar va boshqalar);
- chet el valyutasidagi to‘lov hujjatlari (cheklar, veksellar, akkreditivlar va boshqalar);
- qimmatbaho metallar – har qanday ko‘rinish va holatdagi oltin, kumush, platina hamda platina guruhiga kiruvchi (palladiy, iridiy, rodiy, ruteniy va osmiy), metallar shunday metallardan ishlangan zargarlik buyumlari va boshqa ro‘zg‘or buyumlari hamda ularning parchalari bundan mustasno;
- tabiiy qimmatbaho toshlar – sayqal berilgan va sayqal berilmagan shakldagi olmos, la’l, zumrad, yoqut, aleksandrit, shuningdek‚ marvarid, shunday toshlardan ishlangan zargarlik va boshqa ro‘zg‘or buyumlari hamda ularning parchalari bundan mustasno.
Chet el valyutasiga tegishli ajnabiy davlatda muomalada bo‘lgan va qonuniy to‘lov vositasi hisoblangan banknot ko‘rinishdagi chet el pul belgilari, shuningdek‚ muomaladan chiqarilgan yoki chiqarilayotgan, ammo O‘zbekiston Respublikasi pul belgilariga almashtirilishi lozim bo‘lgan chet el pul belgilari, schyotlarda va omonatlarda bo‘lgan xorijiy davlatlarning pul birliklaridagi va xalqaro hisob-kitob birliklaridagi mablag‘lar kiradi.
Chet el valyutasidagi qimmatli qog‘ozlar – O‘zbekiston Respublikasi qonun hujjatlari yoki xorijiy davlatlarning qonun hujjatlariga muvofiq qimmatli qog‘ozlar jumlasiga kiritilgan, qiymati chet el valyutasida ifodalangan hujjatlaridir⁷⁵.
Globallashgan iqtisodiyot, shuningdek‚ dunyo iqtisodiyotining yagonalashuvi bilan davlatlar o‘rtasidagi savdo iqtisodiy munosabatlar tobora kengayib bormoqda. Bu esa o‘z navbatida har bitta xo‘jalik yurituvchi subyektni eksport-import operatsiyalariga undamoqda. Eksport-import operatsiyalarida ijobiy farqlanishga erishish albatta korxonalar oldiga ham bir qadar murakkab vazifalarni hal etishni va uning mustahkam zaminini yo‘lga qo‘yishni talab etadi.
Bir mamlakat doirasida ko‘p turdagi raqobatbardosh tovarlar va xizmatlar ishlab chiqarish imkoniyati cheklangan. Tashqi bozor mahalliy ishlab chiqaruvchilarning o‘zlari uchun ustun bo‘lgan faoliyat turlari bilan keng doirada shug‘ullanishlariga imkon beradi, ularning faoliyat doirasini kengaytiradi.
Tashqi iqtisodiy faoliyat nafaqat ishlab chiqarishning raqobatbardoshligini oshiradi, balki erkin xo‘jalik yurituvchi subyektlarning iqtisodiy va moliyaviy salohiyatini, shuningdek‚ aholining turmush farovonligini oshirishning ham zaruriy sharti hisoblanadi.
Pul oqimi to‘g‘risidagi hisobot shakliga ilova sifatida xorijiy valyutada pul mablag‘larining harakati to‘g‘risida ma’lumotnoma tuziladi. Unda hisobot davrida xorijiy valyutada pul mablag‘larining to‘liq harakati ko‘rsatiladi.
Valyuta mablag‘lari operatsiyalarni amalga oshirish paytida O‘zbekiston Respublikasi Markaziy bankining kursi bo‘yicha O‘zbekiston Respublikasi milliy valyutasida, valyuta mablag‘lari qoldig‘i esa – hisobot davrining oxirgi sanasida aks ettiriladi.
Ushbu ma’lumotnomaga asosan korxonaning valyuta mablag‘larini harakati tahlil qilinadi.
Korxona tomonidan kirimga olingan valyuta mablag‘lari qatorida: korxona tomonidan hisobot davrida olingan valyuta tushumi summasi; sotib olingan xorijiy valyuta summasi; moliyaviy faoliyatdan olingan valyuta mablag‘lari summasi; korxonaning valyuta hisobvaraqlari va kassasiga boshqa valyuta tushumlari summasi aks etadi.
Korxona tomonidan turli maqsadlarga sarflangan valyuta mablag‘larining qatoriga: mol-mulkni olishga, bajarilgan ishlarga va ko‘rsatilgan xizmatlarga sarflangan valyuta mablag‘lari summasi; moliyaviy faoliyat bo‘yicha sarflangan valyuta mablag‘lari summasi; boshqa maqsadlarga sarflangan valyuta summasi aks etadi.
Chet el valyutasidagi pul mablag‘larini qayta baholashdan yuzaga kelgan musbat yoki manfiy kurs farqlari, hisobot yili boshiga va oxiriga korxonaning valyuta hisobvaraqlari va kassasida bo‘lgan valyuta mablag‘lari alohida qatorlar bo‘yicha aks ettiriladi.
Tahlil etishda valyuta mablag‘lari balansiga muhim ahamiyat qaratiladi. Valyuta balansi quyidagi birliklar ifodasini jamlashni xarakterlaydi.
Vb+Vk=Vch+Vo
Bu yerda:
Vb – valyuta mablag‘lari davr boshiga;
Vk – valyuta mablag‘lari kirimi (mahsulot, tovar, ish va xizmatlarni sotishdan va boshqa tushumlardan);
Vch – valyuta malbag‘lari chiqimi (mahsulot, tovar, ish va xizmatlarni sotib olishdan va boshqa chiqimlar);
Vo – valyuta mablag‘larining davr oxiriga qoldig‘i.
Valyuta mablag‘lari bo‘yicha o‘z-o‘zini moliyalashtirish masalasi xo‘jalik subyektlarining oldidagi eng muhim masala hisoblanadi. Negaki, ba’zan import tovarlari yuzasidan valyuta mablag‘lariga bo‘lgan extiyoj turli qiyinchiliklar tufayli doimo ham hal etilmasligining sababi ham shundan kelib chiqadi. Shu sababli ham eksport-import operatsiyalaridagi ijobiy qoldiqqa chiqish talab etiladi.
Valyuta mablag‘lari bilan moliyalashtirish samaradorligini baholash moliyaviy koeffitsiyentlar orqali baholanadi. Ushbu koeffitsiyent quyidagi formula asosida aniqlanadi.
Kvm=F+A/K+V
Bu yerda:
Kvm – valyuta mablag‘lari bilan moliyalashtirish koeffitsiyenti;
F – valyuta mablag‘larida ishlab chiqarishni moliyalashtirishga yo‘naltirilgan foyda summasi;
A – valyuta mablag‘lari hisobiga olib kelingan asosiy vositalarning amortizatsiyasi;
K – valyuta krediti;
V – banklardan va birjadan sotib olingan valyuta.
Koeffitsiyent qancha yuqori bo‘lsa, o‘z-o‘zini moliyalashtirish darajasi shuncha yuqori bo‘ladi.
Valyuta mablag‘lari bilan qoplanish koeffitsiyenti (Kqk) quyidagi formula asosida topiladi.
Kqk=Vb+Vk/Vch
Vb – valyuta mablag‘lari davr boshiga qoldig‘i;
Vk – hisobot davrida valyuta mablag‘lari kirimi;
Vch – hisobot davrida valyuta mablag‘lari chiqimi.
Kqk>1,0 dan yuqori bo‘lishi o‘z-o‘zini moliyalashtirish shartlarining bajarilganligini bildiradi.
2017-yilning sentyabr oyidan boshlab valyuta kursi shakllanishining bozor mexanizmlariga o‘tilishi va ichki valyuta bozori faoliyatining erkinlashtirilishi nafaqat pul-kredit sohasida, balki butun iqtisodiyotda ijobiy tomonga tub o‘zgarishlarni amalga oshirish uchun muhim zamin yaratdi.
O‘z navbatida, valyuta kursining bozor mexanizmlariga o‘tilishi ya’ni, joriy talab va taklif asosida shakllanishi iqtisodiyotdagi valyuta resurslarining samarali taqsimlash mexanizmi yaratilishiga xizmat qilmoqda.
Mamlakatimiz tashqi savdo operatsiyalarining asosiy qismi AQSh dollarida amalga oshirilishini inobatga olib, so‘mning boshqa xorijiy valyutalarga nisbatan almashuv kurslarini belgilashda operatsion mo‘ljal sifatida so‘mning AQSh dollariga nisbatan almashuv kursidan foydalanilmoqda.