Тошкент давлат юридик университети Конституциявий ҳуқуқ кафедрасининг 2020/2021 ўқув йили кузги семестр давомида ўтиладиган ҳар бир модул хусусиятидан келиб чиққан ҳолда оралиқ назорат сони, шакли ва тартиби

Вазиятга ҳуқуқий баҳо беринг.


5-казус

1. 
   Ш.Рўзиев Тошкент шаҳар Олмазор тумани Сағбон маҳалласида жойлашган хонадонда хотини ва уч фарзанди билан яшаб келар эди. Спиртли ичимликларни ичишга одатланган Ш.Рўзиев ишдан келиб уйида жанжал кўтарарди. Ш.Рўзиевнинг хотини отасининг уйига кетиб қолар ва у ерда бир қанча кун яшаб яна эрининг уйига қайтиб келарди. Ушбу ҳолат фуқароларнинг ўзини ўзи бошқариш органи томонидан унинг оиласини нотинч ва муаммоли оила деб топишга асос бўлди.
   
2. 
   2020 йил 25-27 апрель кунлари Ўзбекистон Республикаси Маҳалла ва оилани қўллаб-қувватлаш вазирлигининг Олмазор туман бўлими томонидан Сағбон маҳалласига нотинч ва муаммоли оилаларни аниқлаш ҳамда уларнинг манзилли рўйхатларини тузиш мақсадида ўрганиш ишлари олиб бориш учун мутахассислар юборилди. Маҳалла ва оилани қўллаб-қувватлаш вазирлигининг Олмазор туман бўлими вакилларига Сағбон маҳалласи фуқаролар ўзини ўзи бошқариш органи раиси Н.Фахриев томонидан маҳалладаги нотинч ва муаммоли оилаларнинг рўйхати тақдим этилди.
   
3. 
   Маҳалла ва оилани қўллаб-қувватлаш вазирлигининг Олмазор туман бўлими вакиллари фуқаро Ш.Рўзиевнинг оиласи ҳақиқатдан нотинч ва муаммоли эканига ишонч ҳосил қилишни истадилар. Шу мақсадида Ш.Рўзиев ҳамда унинг оила аъзолари билан суҳбат олиб бориш учун унинг хонадонига ташриф буюрдилар.
   
4. 
   Бироқ, Ш.Рўзиев вазирлик вакилларининг уйига киритмади ва улар билан суҳбат қуришни ҳам истамади. Шунда, вазирлик вакиллари ва фуқароларнинг ўзини ўзи бошқариш органи раиси Н.Фахриев вазият юзасидан ички ишлар органи профилактика инспекторига мурожаат қилиб, Ўзбекистон Республикаси Вазирлар Маҳкамасининг қарорига кўра бундай оилалар билан тўғридан-тўғри ишлашни ташкил этиш вазирликнинг ваколати эканини айтиб, Ш.Рўзиев ва унинг оила аъзоларини маҳалла идорасига мажбурий келтиришни сўрадилар.
   
5. 
   Ш.Рўзиев профилактика инспекторига вазирликнинг бундай ваколатга эга экани унинг шахсий ҳуқуқлари ва эркинлиги путур етказишини айтиб, умуман бундай вазирликнинг тузилгани оилалар ва улар аъзоларининг шахсий ҳаётига аралашишга олиб келишини таъкидлади ва маҳалла идорасига боришдан бош тортди. Шунга қарамай Ш.Рўзиев профилактика инспектори томонидан маҳалла идорасига олиб келинди ва у билан тегишли суҳбат олиб борилди.
   
6. 
   Маълумоти олий бўлган Ш.Рўзиев изланиб Ўзбекистон Республикаси Маҳалла ва оилани қўллаб-қувватлаш вазирлигининг низомини топиб у билан яқиндан танишиб чиқди. Низом Вазирлар Маҳкамаси томонидан тасдиқлангани сабабли ҳукуматга мурожаат йўллади. Мурожаатда Ўзбекистон Республикаси Маҳалла ва оилани қўллаб-қувватлаш вазирлигининг ташкил этилгани фуқаролар ва оилаларнинг шахсий ҳаётига аралашишга олиб келиши, шу боис мазкур вазирликни тугатиш лозимлигини айтди.
   
7. 
   Вазирлар Маҳкамаси томонидан мурожаатга йўлланган жавобда ушбу вазирлик Ўзбекистон Республикасининг Конституциясида белгиланган тартибга риоя этган ҳолда ташкил этилгани, Конституциянинг 3-моддасига кўра Ўзбекистон Республикаси давлат ҳокимияти ва бошқарув органларининг тизимини белгилашга ҳақли бўлиб, Маҳалла ва оилани қўллаб-қувватлаш вазирлигини ташкил этилиши айни шу конституциявий принципга асосланиши тушунтирилди.
   
8. 
   Ш.Рўзиев мурожаатига йўлланган жавобдан норози бўлиб Ўзбекистон Республикаси Конституциявий судига Ўзбекистон Республикаси Маҳалла ва оилани қўллаб-қувватлаш вазирлигини ташкил этишга доир қонун ҳужжатларини Ўзбекистон Республикасининг Конституциясига зид топишни сўраб мурожаат этди.