Toshkent davlat texnika universiteti tasdiqlayman

1. Suvni tahlil qilish
Oziq-ovqat sanoatida ishlatiladigan suv ichimlik suviga bo‘lgan GOST talablariga javob berishi kerak. Shahar suv tarmog‘idan foydalanilganda har kvartalda bir marta, shaxsiy suv tarmog‘i bo‘lsa, oyda bir marta; bakteriyalarning umumiy miqdori, ichak tayoqchalari guruhiga mansub bakteriyalar soni va patogen mikroorganizmlar (qorin tifi, vabo, ichburug‘ kasalliklarini tarqatuvchilar) bor-yo‘qligi aniqlanadi. Patogen mikroblarni aniqlash bo‘yicha tahlil ishlari sanitariya inspeksiyasi laboratoriyasida olib boriladi.
Namuna tanlab (ajratib) olish. Buning uchun idishlar (kolba, butilkalar – 0,25; 0,5 va 1 l ga mo‘ljallangan) yaxshilab yuvilib, og‘zi paxta-doka tiqin bilan berkitiladi, ustidan qog‘oz qalpoqcha kiydirib, bo‘yni bog‘lanadi va avtoklavda 120^oC da 30 minut sterillanadi, Xlorlangan suv namunasi uchun sterillashdan oldin butilkaga natriy tiosulfatning 1,5% li eritmasidan 2 ml qo‘yiladi. Quruq issiqda sterillangan idishga, namuna olishdan ilgari, aseptika qoidalariga amal qilgan holda 2 ml natriy tiosulfat quyiladi.
Jumrak yoki chiqarish quvurining cheti kavsharlash lampasi yoki spirt shimdirib yoqilgan paxta tampon bilan kuydiriladi. Jumrakni ochib, 10-15 minut davomida suv oqiziladi, shundan keyingina namuna olinadi. Suv namunasi oldindan tayyorlab qo‘yilgan idishga, paxta tiqinini ho‘l qilib yubormay olinadi. Idishni alanga ustida tutib turib, og‘zi tiqin bilan berkitiladi va bog‘lab qo‘yiladi. Ochiq suv havzalarida namunalar chuqurdan batometr yordamida olinadi. Buning uchun batometrni suvga tushirib (ma’lum chuqurlikka), arqonchasini tortib qopqog‘i ochiladi. Idish suvga to‘lgandan keyin arqonchasi bo‘shashtiriladi va tiqin o‘z-o‘zidan berkitiladi. Batometrni suvdan chiqarib olib, metall tiqinni paxta tiqiniga almashtiriladi. Suv namunasi bo‘lgan butilkalarga manbaning nomi va qaeyrda joylashganligi, namuna olingan kun va soat, meteorologik sharoit (havo harorati, yog‘in), tekshirishdan maqsad, namuna olgan yoki uni tahlilga yuborgan shaxsning lavozimi yozib qo‘yiladi va imzo chekiladi.
Suvdan namuna olganda 2 soatdan kechiktirmay tahlil qilish kerak. Namunani 5^oC dan oshmaydigan haroratda tashish va 6 soatdan kechiktirmay tekshirish kerak. Namunalarni qishda yaxlab qolishdan, yozda isib ketishdan asrash kerak.