Tilshunoslikka kirish

Tipologik yoki morfologik tasnif.

XIX-XX asrlarda tillar yana bir jihatdan tipologik jihatdan tasnif qilindi. Tipologiya - grek (typos - shakl, namuna, logos - ta'limot) bo`lib, ushbu tasnifning maqsadi shundan iboratki, tillar qarindosh yoki qarindosh emasligidan qat'i nazar ichki tuzilishi, morfologik tuzilishiga ko`ra guruhlanadi. Shu bois ushbu tasnif ikki xil nom bilan - tipologik yoki morfologik tasnif deb yuritiladi. Tipologiya bir tomondan, tillarni tasnif qilishning umumiy nazariyalari, qonun-qoidalari va usullarini o`z ichiga olsa, ikkinchi tomondan u til sistemasi birliklarini umumiy belgisi, xususiyati asosida tasnif qilish bilan shug`ullanadi. Lingvistik tipologiya til sistemasi va strukturasi qonun-qoidalariga tayangan holda tilning umumiy va o`ziga xos kategoriyalarini o`rganadi. Tilshunoslik tarixida tipologiya qiyoslanayotgan tillar tahlili va tadqiqida o`z vazifasini, faoliyatini dialektik falsafaning metodologik asosi bo`lib xizmat qiluvchi muhim kategoriyalarining biri umumiylik va xususiylik kategoriyasiga ko`ra ish olib boradi. Shu jarayonda tillarning sistem-struktur tabiatiga xos jihatlar, alohidaliklar aniqlanadi. Tipologiya tilshunoslikning muayyan sohasi sifatida tillarni tipologik klassifikatsiya qilish bilan shug`ullanadi.