Tibbiyot instituti talabalari uchun

Chiqish teshigi.
Chiqish teshigining shakli turli tumandir. U yulduzsimon, 
krestga o’xshash, yoriqsimon, burchaksimon, noaniq, ba’zan yumaloq yoki oval 
shaklda ko’zga tashlandi. Ko’pchilik hollarda unda to’qima defekti bo’lmaydi, 
shuning uchun uning chetlari yaqinlashtirilganda yara bo’shlig’ini to’lig’icha 
yopadi. Ammo ayrim hollarda, ayniqsa, yumaloq yoki oval shakldagi chiqish 
teshigida uncha katta bo’lmagan defekt ko’rinadi. Chiqish teshigining o’lchami 
ko’pincha kirish teshigiga qaraganda kattaroq bo’lib, u chiqish teshigidan 
chiquvchi suyak parchalari ta’sirida uning chetlari yirtilishi va chiqish joyidagi 
yumshoq to’qimalarda o’kning gidrodinamik ta’siri tufayli sodir bo’ladi. Bundan 
tashqari, bu o’qning odam tanasidan chiqayotganidagi holati va 
deformatsiyalanishiga ham bog’liqligi aniqlangan.
Agar o’k deformatsiyaga uchramagan bo’lsa, tanadan boshi bilan 
chiqayotganida kinetik energiyasi kamaygani uchun chiqish teshigi ancha katta 
o’lchamli, ko’pincha yoriqsimon, ba’zan yumaloq shaklda bo’ladi. Chiqish 
teshigining chetlari odatda notekis, ko’pincha tashqariga ag’darilgan bo’ladi. 
Ba’zan kirish teshigidagi belbog’chaga to’g’ri keluvchi va shunga o’xshash chiqish 
teshigi chetlarida epidermisda hoshiyalanish ko’rinadi. Bu hoshiyalanish o’qni teri 
orqali o’tish paytida yara chetlarini kiyimiga urilishi va qisilishidan sodir bo’ladi.