7-боб. Реклама-ахборот белгиларини жойлаштириш 44. Реклама-ахборот белгиси йўл яқинида тор профилли объектлар (умумий овқатланиш корхоналари, шиналар, транспорт воситаларини таъмирлаш ташкилотлари, эҳтиёт қисмлар дўконлари ва бошқалар) тўғрисида ахборот бериш мақсадида ўрнатилади.
Реклама-ахборот белгиси ахборот майдонининг юзаси унинг ташқи габарит ўлчамлари бўйича аниқланади, бироқ 1,0 кв. метрдан ошмаслиги керак. Реклама-ахборот белгилари йўл белгиларига ўхшамаслиги лозим.
8-боб. Ҳажмли-фазовий конструкцияларни жойлаштириш 45. Ҳажмли-фазовий конструкциялардан конструкциянинг ҳам ҳажми, ҳам юзасидан фойдаланган ҳолда реклама ахборотини тарқатиш учун фойдаланилади.
Улар якка тартибдаги лойиҳалар бўйича бажарилади ва ҳар бир алоҳида ҳолатда белгиланган тартибда тасдиқланади.
Бундай турдаги конструкциялар ва уларни жойлаштириш шитли қурилмаларни ўрнатиш учун қўйиладиган талабларга (улар билан боғлиқ бўлган ҳолларда) мувофиқ амалга оширилади.
46. Ҳажмли-фазовий конструкцияларда ташқи рекламани жойлаштиришга рухсатномаларни рўйхатдан ўтказиш ушбу Низомда белгиланган тартибда амалга оширилади.
9-боб. Байроқли композиция ва соябонларни жойлаштириш 47. Байроқли композиция — асос ва бир ёки бир нечта флагшток (устунча) ҳамда юмшоқ матодан иборат реклама конструкцияси.
48. Байроқнинг ахборот юзаси майдони матонинг иккала томони юзаси билан белгиланади.
Соябоннинг ахборот юзаси майдони унинг битта томони юзаси билан белгиланади.
49. Байроқлар ва тўсинларга, маркизларга ташқи реклама жойлаштиришга рухсатномаларни рўйхатдан ўтказиш ушбу Низомда белгиланган тартибда амалга оширилади.
10-боб. Том усти конструкцияларини жойлаштириш 50. Том устидаги (том усти конструкциялари) ташқи реклама объектларининг баландлиги бино умумий баландлигининг 1/3 қисмидан ошмаслиги ва электр таъминоти тармоғидан фавқулодда узилиш тизими билан жиҳозланган бўлиши керак ҳамда реклама конструкциясининг эгаси тўғрисида маълумотлар акс этган ердан кўринувчи таблога эга бўлиши лозим.
Хусусий бино (иншоот) эгалари томларга ташқи реклама объектларини (том усти конструкциялари) «Е-IJRO AUKSION» ягона электрон савдо майдони орқали электрон аукцион савдоси жараёнларидан ўтмасдан туриб, Давлат хизмат кўрсатиш марказлари орқали паспорт олиш ҳуқуқига эгадирлар.
51. Биноларда ўрнатилган том усти қурилмалари ахборот юзаси майдонининг тўлов суммасини ҳисоблашда бутун конструкциянинг ташқи габарит ўлчамлари бўйича аниқланади.
Конструкция ўрнатилган жойнинг ижараси бинонинг баланс эгаси билан алоҳида келишув бўйича амалга оширилади. Ваколатли орган реклама тарқатувчи билан бинони баланс эгаси ўртасидаги муносабатларга аралашишга ҳақли эмас.
52. Ташқи реклама объектларини том қисмига жойлаштиришга рухсатномаларни рўйхатдан ўтказиш ушбу Низомда белгиланган тартибда амалга оширилади.