Tanishiv amaliyoti farmatsevtika ishini tashkil qilish. Dorixona qanday bo’limlardan iborat(turadi)

Иссиқ ҳаво ёрдамида стериллаш

Иссиқ ҳаво ёрдамида стериллаш қуритиш камераларида 160, 180 ёки 200⁰ С ҳароратда олиб борилади. Усулнинг самарадорлиги ҳароратга, вақтга, стерилланувчи объектнинг иссиқлик ўтказувчанлигига, уларнинг стериллаш камерасида иссиқ ҳаво циркуляциясини таъминлай оладиган бўлиб жойлашганлигига боғлиқдир.

Радиацион стериллаш усули

Бу усул хозирги кунда АҚШ ва Англияда кўп ишлатиладиган стериллаш усули ҳисобланади. Нур билан стериллаш ўз хоссаси билан совуқ усул ҳисобланиб, унда стерилланаётган предмет - ҳарорати 3% гача ошиши мумкин. Шу сабабли бу усул ҳароратга чидамсиз дори моддаларни стериллаш учун қулай ҳисобланади.

Сунъий равишда олинган радиоактив изотоплардан Со⁶⁰ ва ядро реакторлари қолдиқлари радиацион нурланиш манбаалари бўлиши мумкин. Одатда стериллашга 2,5х10⁶ рад. етарли ҳисобланади. Мосламада ишлаётган одамлар, ишлаш вақтида уни таъсиридан муҳофаза қилиниши керак, қолдиқ радиацияни чақирмайди.

Объект жиҳозланган холда стерилланиши мумкин. Радиоактив нурлар таъсирида ўтказиладиган стериллаш механизмини аниқ айтиш қийин, аммо шу нарса аниқки, стериллаш натижасида оз-оз миқдорда бўлса ҳам турли парчаланиш маҳсулотлари ажралади. Углеводлар, ароматик бирикмалар, оқсиллар, аминокислоталар, антибиотиклар, витаминларнинг радиоактив нур таъсирида стериллаш натижалари ўрганилган. Хирургия амалиётида ишлатиладиган кетгут, плазма, боғлайдиган-ўрайдиган ашъёларнинг стериллаш натижалари ўрганилган. Дорихона шароитида бу усул қўлланилмайди.

ФИЛЬТРЛАБ СТЕРИЛЛАШ

Фильтрлаб стериллаш деб, майда тешикчали фильтрлар орқали эритмаларни фильтрлаб, микроорганизм ва уларнинг спораларидан тозалаш усулига айтилади. Бу усул xозирги кунда фармацевтик корхоналарда жуда кенг қўлланиладиган усул ҳисобланиб, дорихона амалиётида ҳам қўлланиш меъёрлари ишлаб чиқилмоқда. Асосан бу усул ёрдамида ҳароратга чидамсиз бўлган дори моддалар эритмалари стерилланади. Термик стериллашдан олдинги жараён сифатида механик усулда эритмани микроорганизмлардан тозалаб олиш ҳозирги вақтда кенг қўлланилмоқда ва яхши самара бераяпти. Бу фильтрлар асосан керамика, шишадан ва синтетик толалардан тайёрланадиган мембранали фильтрлардир.

Микротешикчали фильтрларни тозалаш хусусияти микроорганизм таначаларини механик тўсиқда ушлаб қолишгагина асосланган бўлмай, балки шу тешикча юзаси ва ғоваклари орасига уларнинг таначаларини сўрилиб (адсорбцияланиб) қолишига асосланган. Бу усулни қўллашдаги текширишларни кўрсатишича фильтрларнинг адсорбцион хусусияти микроорганизм тури, уни эритмадаги миқдори ва фильтрлаш шароити билан боғлиқдир.

Бу фильтрларга бактериологик шамча деб аталувчи цилиндрсимон шаклда, ўртаси бўш силлиқланмаган фарфордан ясалган керамик (сопол) фильтрлар киради. Бу "шамчалар" орқали фильтрлаш 2 усулда олиб борилиши мумкин. Биринчи усул суюқлик устки очиқ тешик орқали фильтр ичига тушиб ундан босим таъсирида идишга фильтрланади. Иккинчи усул: фильтрини устки очиқ тешиги орқали маҳсус мослама билан бошқа идишга бириктирилиб, шамча эритма ичига туширилади ва бириктирилган идишдаги ҳаво сўриб олиниши натижасида фильтрланади.
КИМЁВИЙ СТЕРИЛЛАШ

Кимёвий стерилаш усули микрофлорага кимёвий моддаларни таъсир эттириш йўли билан олиб борилади. Уларнинг баъзилари микроорганизмларни ўлдиради, яъни бактерицид таъсир кўрсатади. Бундай кимёвий моддалар антисептиклар деб аталади. Бошқа бир моддалар микроорганизмларни ўлдирмайди, лекин кейинги ривожланишни тўхтатиб қўяди. Улар консервантлар деб номланади. Ҳозир тиббиёт амалиётида антисептик ва консервант моддалардан етарли даражада фойдаланилмоқда.

Дорилар учун антисептиклар сифатида қўлланиладиган моддаларнинг организмга салбий таъсири бўлмаслиги керак. Масалан: симоб дихлорид кучли антисептик бўлишига қарамай, уни бу мақсадда ишлатиб бўлмайди. Дори таркибида консервантларни қўлланилиши биринчидан микроорганизмларни кўпайишини тўхтатса, иккинчидан дори препарати очилганда унга ташқаридан микроорганизм тушиб, кўпайиш ҳавфини пасайтиради.

Фармацевтика амалиётида консервантлар сифатида қуйидаги моддалар ишлатилади.

Нипагин - параоксибензой кислотасининг метил эфири, оқ кристалл порошок, сувда оз эрийди (20⁰С да 0,25%), спиртда эрийди. 0,05 % концентрацияданоқ таъсир эта бошлайди. 0,03% да бу консервант безиён ҳисобланади. 0,25% гача концентрацияда ишлатилади. Бактерицид таъсири фенолдан 2,6 марта юқори.

Нипазол - параоксибензой кислотасининг пропил эфири. Сувда 0,03 % да эрийди. Бактерицид таъсири фенолдан 15 марта юқори. Қийин эрийдиган бўлгани учун 0,07 % ли аралаш эритма xолида фойдаланилади. Бу аралашма 7 қисм нипагиндан ва 3 қисм нипазолдан ташкил топган бўлиб, ишончли консервант ҳисобланади. Аралашма эритувчи сифатида қиздирилганда тез парчаланадиган моддалардан инъекцион эритмалар тайёрлашда қўлланилади.

Хлорбутанолгидрат - (хлорэтон) рангсиз кристалл модда, камфора ҳидига эга, 200 г сувда эрийди. Спиртда осон эрийди. 0,5 % гача концентрацияда қўлланилади.

Трикрезол - метилфенол, юқори бактерицид хусусиятга эга, токсик таъсири фенолга нисбатан жуда паст 0,3% гача концентрацияда қўлланилади.

Фенол - 0,5 % гача концентрацияда қўлланилади.

Фенилэтил спирти чет элларда кўп қўлланилади, 0,3 % ли эритмаси кўз томчиларини консервантлашда ишлатилади.

Газ ёрдамида стериллаш

Бу хил кимёвий стериллаш тури, учувчан, дезинфекцияловчи моддаларни қўллашга асосланган бўлиб, уларни вакуум ҳосил қилиш орқали ёки енгил иситиш орқали эритма таркибидан чиқариб юбориш мумкин. Бу усул ҳароратга чидамсиз бўлган дори препаратларини стериллашда ишлатилади. Амалиётда ҳозирги кунда ишлатилаётганларидан суюқ этилен оксид ва -пропионлактонлар маълум. Уларни бактерицид хусусияти эритмада гидролизланиб, микроорганизмларга кучли таъсир кўрсатадиган моддалар ҳосил бўлишига асосланган. Эритмаларни стериллаш учун этилен оксидни 400-500 мг/л миқдор концентрацияси етарли ҳисобланади. Стериллаш вақти 6 соат, этилен оксид гидролизланганда этиленгликоль ҳосил бўлади. Этилен оксид ва СО₂ аралашмаси билан стериллаш усули АҚШ (1965й) ва Англиянинг (1963 й) фармакопеяларида кўрсатилган.

Суюқ этилен оксид 10,7⁰С қайнайди, пўлат балонларда сақланади. Осон ёнувчан. Терига салбий таъсир кўрсатади. 0,5 мг/л концентрацияда этилен оксид одамга заҳарловчи таъсир кўрсатмайди. Заҳарли таъсирни камайтириш учун СО₂ аралашмаси билан ишлатилади (9+1) қисм. Чет элларда этилен оксид термолабил моддаларни стериллаш учун ишлатилади. Бундан ташқари асбобларни, аппаратни, пластмассани, боғлов материалларини стериллаш учун ишлатилади. Стериллаш махсус аппарат камераларида навбатма-навбат вакуум ва босим таъсир эттириб олиб борилади. Кейин 2-4 марта стерил ҳаво билан "ювилади".

-пропионлактон суюқлик бўлиб, қайнаш ҳарорати 153⁰С. Сувда эриганда -оксипропион кислотагача гидролизланади. 0,2% ли -пропионлактон эритмаларни стериллаш учун ишлатилади, 37⁰Сда 2 соат инкубация қилинади. Газ ҳолидаги -пропионлактон кўздан ёш оқизувчи таъсир кўрсатади.