Talabasi Abdusattorova Hilolaxonning

2.4 Amperometrik titrlashning afzalligi.

Amperometrik titrlashning afzalligi. Boshqa fizik-kimyoviy titrlash usullariga shuningdek, hajmiy indikatorli titrlashga nisbatan amperometrik titrlashning afzalligi shundaki, bu usulda titrlash egri chizig’ini tuzish uchun ekvivalentlik nuqtasidan uzoqroqda joylashgan bir necha nuqtani olishning o’zi kifoya va bu nuqtalar eritmada reaksiyaga kirishuvchi moddalardan birining ortiqchasi mavjudligida olinadi. Amperometrik titrlashda cho’ktirish reaksiyalaridan foydalanilganda titrlash egri chizig’i uchun nuqtalar cho’kmaning eruvchanligi ekvivalentlik nuqtasidagidan kamroq bo’lgan sharoitda olinadi. Shu tufayli bu usuldan ancha yaxshi eruvchan cho’kmalar hosil qiladigan moddalarni aniqlashda va potensiometrik hamda indikatorli usullar yaxshi natija bermaydigan hollarda foydalanish mumkin. Bundan tashqari analizning boshqa elektrometrik usullaridan farqli ravishda bu usul moddaning juda suyultirilgan eritmalardagi miqdorlarini aniqlashga imkon beradi. Polyaragrafiyada aniqlanuvchi modda konsentratsiyasi 10^-4 mol/l dan kam bo’lganida aniqlanuvchi ion to’lqini juda kichik bo’ladi, galvanometrning sezgirligini oshirish esa aniqlashni qiyinlashtiruvchi qoldiq tok ta’sirining kuchayishiga olib keladi. Amperometrik titrlashni modda konsentratsiyasi 10^-6mol/l bo’lganida ham o’tkazish mumkin. Shu sababli ekvivalentlik nuqtasidan keyin elektrodda titrant ionning oksidlanishi yoki qaytarilishi muvofiq keladigan tok kuchi anchagina katta bo’lishi mumkin, bunda ekvivalentlik nuqtasida titrlanuvchi ionning konsentratsiyasi oz bo’lishiga qaramay titrlash egri chizig’idagi egilish keskin bo’ladi. Amperometrik titrlash usulida organik reaktivlardan keng foydalanish mumkin. Potensiometrik titrlashda esa tegishli indikator elektrodlar yo’qligi tufayli ko’pincha bu reaktivlarni ishlatish mumkin bo’lmaydi. Amalda qo’llanishi. Volt-amperometriya usuli ko’pchilik metallarni aniqlash uchun qo’llaniladi. Bu usulda rudalar, qotishmalar va boshqa tabiiy hamda texnik ob’ektlar tarkibidagi kobalt, mis, qo’rg’oshin, marganes, nikel, qalay, rux, temir va ko’pgina boshqa metallarni aniqlash mumkin. Shuningdek ko’pchilik organik birikmalarni ham aniqlasa bo’ladi.Yarim to’lqin potensiallari bir-biridan anchagina farqlanadigan bo’lganda aralashmadagi bir necha komponentni bir- biridan ajratmay turib miqdoriy aniqlash mumkin. Volt-amperometrik usuli ancha universalroq bo’lgani uchun undan turli- tuman ob’ektlarni tekshirish uchun foydalansa bo’ladi