Тактиканинг фан сифатида вазифалари

Mudofaaga o‘tishda texnik ta’minot
Mudofaaga o‘tishda bo‘linmalarning texnik ta’minoti taktik, texnik va ichkari (frontorti) vaziyatining aniq sharoitlarini hisobga olgan holda tashkil etiladi.

Texnik ta’minotni tashkil etish uchun qulay sharoitlar mudofaaga dushman bilan yaqinlashuv (to‘qnashuv) yo‘q hollarda vujudga keladi, chunki o‘q-dorilar va boshqa moddiy vositalarning qo‘shimcha zahiralarini barvaqt to‘ldirish va yaratish, texnik xizmat ko‘rsatilishi talab etilayotgan qurol-aslaha va harbiy texnikani dushman mudofaaning oldingi chizig‘iga kelgunicha puxta tayyorlash imkoni bo‘ladi.

Dushman bilan bevosita yaqinlashuv (to‘qnashuv) sharoitida texnik ta’minotning qiyinligi shundaki, bo‘linmalar jangovar mashinalarda va batalonlarning moddiy ta’minot guruhlarida qolgan o‘q-dori, yonilg‘i va ZTMM bilan mudofaaga o‘tishadi. Bunday hollarda qurol-aslaha va harbiy texnikaga texnik xizmat ko‘rsatish, shaxsiy tarkibni va texnik ta’minot kuch va vositalarini tayyorlashning amalda iloji bo‘lmaydi.

Mudofaaga o‘tishda texnik ta’minotni bo‘linma komandiri shaxsan o‘zi shtab boshlig‘i, komandirning qurol-aslaha bo‘yicha o‘rinbosari va moddiy ta’minot guruhi komandiri orqali tashkil etadi.

Komandirning mudofaaga qarori va texnik ta’minot bo‘yicha katta boshliqning ko‘rsatmalari texnik ta’minotni tashkil etish uchun asos bo‘ladi.

Batalon komandirining qurol-aslaha bo‘yicha o‘rinbosarining mudofaada texnik ta’minotni tashkil etish bo‘yicha ish tartibi qo‘yilgan vazifaga, dushmanning uzoqligi va uning harakatlari xarakteriga, bo‘linmalarning qurol-aslaha va harbiy texnikasini, o‘zining va qo‘shib berilgan texnik ta’minot kuch va vositalarining holatiga, vaqtning mavjudligiga bog‘liq bo‘ladi.