Tadbirkorlik asoslari sohasi

Davlat korxonalari – davlat mulki bo‘lgan va uning nazorati ostida bo‘lgan korxonalar. Mazkur korxonalar davlat va mahalliy hokimiyat organlariga qarashli bo‘ladi va birgalikda davlat sektori tashkil etiladi. O‘zbekiston Respublikasida YM ishlab chiqarishda davlat sektorining hissasi yil sayin kamayib bormoqda. Bu holat o‘z-o‘zidan bozor munosabatlarining rivojlanib, takomillashib borayotganligidan darak beradi.

Aralash korxonalar – turli mulk shakllariga taalluqli firmalar bo‘lib, xususiy, davlat va jamoa mulkining aralash mablag‘lari asosida tashkil etiladi. Ular sirasiga qo‘shma korxonalarni ham kiritish mumkin. Qo‘shma korxonalar xorijiy va milliy kapitalning aralashuvida vujudga keladi.

Konsorsium – korxonalarning vaqtincha tashkil etilgan birlashmalari. Ularga odatda moliyaviy ishlar yuzasidan tashkil etilib, unga davlat, banklar, moliya, investitsiya kompaniyalari, yirik firmalar, har xil pul fondi tashkilotlari uyushadi.

Konsern – ishlab chiqarish, investitsiya, moliya, texnika va tashqi iqtisodiy aloqalar sohasida birgalikda ish yuritishni ko‘zlaydigan korxonalarning majmuasi hisoblanadi. Konsernlar bir yoki bir necha tarmoqlararo birlashmalar tarzida namoyon bo‘ladi.