Табиий сув манбаларининг асосий сифат кўрсаткичлари ва уларнинг меъёрий талабга жавоб бериши

Сувнинг ҳарорати. Ер усти манбаларидаги сувнинг ҳарорати йил фасллари мобайнида ўзгаришига боғлиқ ҳолда, ўзгариб туради. Ер ости сувлари, хусусан артезиан сувлари ҳарорати йил мобайнида доимо бир хил - 8-12⁰С гача бўлиб, ичимлик сув ҳарорати ҳам 7-12 ⁰С бўлиши мақсадга мувофиқдир.
Сувнинг қаттиқлиги. Сув таркибида кальций ва магний тузларининг бўлиши унинг қаттиқлигига олиб келади. Карбонатли ва карбонатсиз қаттиқликлар бўлиб, уларнинг йиғиндиси умумий қаттиқлик деб аталади. Ичимлик сувининг қаттиқ бўлиши одам организми учун хатарли эмас ва сувнинг таъмини ҳам ўзгартирмайди. Қаттиқ сув саноат учун бир қатор ноқулайликлар; қувур ва иссиқлик қозонларида қуйқа ҳосил бўлиши, ювиш корхоналарида хом - ашё маҳсулоти миқдорини ошиши, умумий овқатланиш корхоналарида гўшт ва гўшт махсулотлари, сабзавотларни тайёрлаш вақтини узайиши ва бошқа омилар билан боғлиқ бўлади.
Сифат талаби бўйича ичимлик сувда умумий сув қаттиқлиги 7мг ∙ экв/л бўлиб айрим ҳолларда 10мг ∙экв/л гача рухсат берилади.
Сувда газларнинг бўлиши. Табиий сувлар таркибида кўп ҳолларда кислород (О₂), икки оксидли углерод (СО₂) ва олтингугурт водороди (Н₂ S) кўп учрайди. Биринчи икки ҳолдаги газларнинг бўлиши сув сифатига таъсир этмаса ҳам, сув ташувчи қувур деворларини, сув сақловчи сиғимлар ва иншоот жиҳозларини коррозияга олиб келади. Бу жараён сув ҳароратининг кўтарилиши билан жадаллашиб боради. Ўрта ва юқори босимли буғ қозонларида кислороднинг бўлишига рухсат этилмайди.
Сувдаги эриган кислороднинг миқдори, сувнинг иссиқлик даражаси ва ташқи босим миқдорига боғлиқ.
Агар сув таркибида эриган кислород миқдори кам бўлса, бу уни ифлосланмаганлигини кўрсатади. Хўжалик ичимлик сувлари учун ишлатиладиган дарё сувида эриган кислород миқдори 4 мгл. дан кам бўлмаслиги шарт, чунки 1-1,5 мгл бошлаб ундаги балиқлар нобуд бўлади. Олтингугурт водородини (H₂S) нинг сув таркибида бўлиши, сувдан қўланса ҳид чиқаришига (20-40 мгл юқори), қувурларнинг ички қисмига олтингугурт бактериялари билан тўлишига олиб келади.