С¤з боши ¤рнида

СЎЗ БОШИ
Ўзбекистонни жаҳон ҳамжамиятига интеграциялашувида бухгалтерия ҳисоби тизимини молиявий ҳисоботнинг халқаро стандартлари (IAS, IFRS) талабларига мос ҳолда ташкил қилиш долзарб масалалардан бирига айланиб бормоқда. Шу нуқтаи назардан ҳам, хўжалик юритувчи субъектларнинг фаолиятлари тўғрисидаги ишончли ахборотларни таъминлаш зарурлиги ва ушбу вазифани бажаришда бухгалтерия ҳисоби муҳим рол ўйнайди.
2017-2021 йилларда Ўзбекистон Республикасини ривожлантиришнинг Ҳаракатлар стратегиясида ҳам банк-молия, реал сектор корхоналарни жадал ривожлантириш, диверсификация қилиш ва сифатини яхшилаш масалалари илгари сурилган. Бу эса улар ҳақидаги ишончли маълумотларни шакллантирувчи бухгалтерия ҳисоби тизимини халқаро стандартлар (МҲХС)га мувофиқлаштириб бориш кераклигини билдиради..
Мазкур дарслик Ўзбекистон Республикаси Президентининг “2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини “Илм, маърифат ва рақамли иқтисодиётни ривожлантириш йили”да амалга оширишга оид давлат дастури тўғрисида”ги ПФ-5953-сонли фармони (2020 й. 2 март), Ўзбекистон Республикаси Президентининг “2019-2021 йилларда Ўзбекистон Республикасини инновацион ривожлантириш стратегиясини тасдиқлаш тўғрисида” ПФ-5544-сонли фармони ҳамда Ўзбекистон Республикси Президентининг 2020 йил 24 февралдаги 4611-сонли “Молиявий ҳисоботнинг халқаро стандартларига ўтиш бўйича қўшимча чора-тадбирлар тўғрисида”ги қарорига асосан, Тошкент молия институтида 2020-2021 йилларда амалга ошириладиган Илмий-инновацион тадқиқотлар дастури”ига мувофиқ, Молиявий ҳисоботнинг халқаро стандартлари Фонди (© МҲХС Фонди) нашри асосида яратилган.
Дарслик жами 16та бобдан иборат бўлиб, унда молиявий ҳисоботларнинг келиб чиқиш тарихи ва ривожланиши, жаҳон амалиётда тан олинган бухгалтерия ҳисобининг халқаро моделлари, молиявий ҳисоботларни тақдим этиш, ҳисоб сиёсати, ҳисоб баҳоларини ўзгартириш ва хатолар, валюта курсларидаги ўзгаришларнинг таъсирлари, заҳиралар, асосий воситалар, номоддий активлар, жамланган ва алоҳида молиявий ҳисоботни тузиш каби халқаро стандартлар баёни келтирилган.
Ушбу дарсликни тайёрлашда ўз фикр ва мулоҳазаларини билдириб, яқиндан ёрдам берган и.ф.д., проф. Н.Каримов (Аудиторлар Палатаси), и.ф.д. проф. М.М.Тўлаходжаева (ЎзР БАМА), и.ф.д. проф. К.Р.Ҳотамов (ТМИ), и.ф.д. проф. С.Ташназаров (СамИСИ), и.ф.н., доц. М.Д.Марпатов (ЎзР МБ), и.ф.н., доц. З.А.Умаров (ТМИ)га ўз минатдорчилигимизни билдирамиз.
Муаллифлар