Сувни натрий катионитли фильтрлар ёрдамида юмшатиш

7.4. Натрий катионитли қурилмаларнинг ёрдамчи ускуналари.
Бу расмда аввал Na₂ сўнг Na₁ фильтрларни тўғри йўналишда регенерация қилиш натижасида регенерациядан кейин катионитлар ҳажмида қолган Ca ва Mg катионларининг концентрацияси катионит қатлами баландлиги бўйича қандай миқдорда бўлиши чизилган ҳолатда кўрсатилган. Расмдан кўринадики, эритма аввал Na₂ фильтрлардан ўтиши сабабли, бу фильтрларда катионит таркибида қолган Ca ва Mg катионлар миқдори Na₁-фильтрлардагига қараганда бирмунча кам. Шу сабабли Na₂ фильтрларнинг самарадорлиги юқори ҳамда ишлаш муддати анча унумли бўлади.
Сувни юмшатадиган натрий катионитли қурилмаларнинг ёрдамчи ускуналари асосан ош тузини қуруқ ёки хўл ҳолатда сақлайдиган омборлар, темир бетон ҳовузлар, катионитни яйратишда, ювишда ишлатиладиган сувни сақлаш учун баклар, туз эритмаси сарфини ўлчайдиган асбоблар эритмани тортиб олиб катионитга юборувчи сўрғичлар ёки дозаторлар ҳамда эритмани қиздирувчи ускуналардан иборат бўлади.
Сув юмшатиш қурилмаларида ош тузи кўпинча темир бетон ҳовузларда хўл ҳолатда сақланади. 7.8- расмда тузни темир бетон ҳовузларда сақлаш, ва эритмасини тайёрлаш, ҳамда эритмани фильтрларга юбориш схемаси кўрсатилган.
7
.8-расм. Натрий катионит курилмаси учун туз эритмаси тайёрлайдиган хўжаликнинг схемаси.
1-туз келтирувчи вагон; 2-тузни бўтқа ҳолатда сақловчи ҳовуз; 3-тешикли тўсиқ; 4-туз эритмасини сақланадиган ва қиздириладиган ҳовуз; 5-иситувчи қурилма; 6-эритмани тортиб олувчи сўрҳич; 7-кварц қумли фильтр; 8-қуюқ туз эритмасини сақловчи бак; 9-эритмани фильтрларга юборадиган эжектор.
Туз эритмаси сақланадиган ҳовузлар (2) бинодан ташқарида бўлиб, унга темир йўл вагонлари ёки бошқа транспорт воситалари бемалол кела оладиган бўлиши керак. Ҳовуздан туз эритмаси тешикли (3) тўсиқ орқали қиздирадиган ҳовузга (4) келиб қўйилади ва ундаги иситувчи системаларга буғ берилиб эритма қиздирилади. Эритма махсус сўрҳич (6) орқали сўриб олиниб кварц қумли фильтрдан соатига 4-5 м тезликда ўтказилади. Фильтрда тозаланган қуюқ туз эритмаси бак (8) да сув билан аралаштирилиб керакли даражагача суюлтирилгач эжектор (9) ёрдамида фильтрларга юборилади.
Туз сарфи бир кеча кундузда 500 кг дан кам бўлган сув юмшатадиган қурилмаларда тузни иситилмайдиган хоналарда сақлаб, эритиш учун махсус туз эритувчи қурилмалардан фойдаланиш ҳам мумкин. Бу ҳолда туз фақат катионитни регенерация қилиш олдидан эритилади. Туз эритувчи қўлланилганда ундан чиқаётган эритма аввал қуюқроқ (20% ли) кейин тобора суюқлашиб бориши (0,5%гача) сабабли, эритманинг бир хил концентрацияли бўлиши учун туз эритувчидан чиқаётган эритма қўшимча бакка йиғилади ва ундан сўнг катионитга керакли % ли эритма тайёрланиб, сўнг юборилади.