Soliqlarning kelib chiqishi Soliq to‘lovchilar

Soliq huquqiy munosabatlar

Soliq huquqiy munosabatlari tushunchasi. Soliq solish jarayonida vujudga keladigan huquqiy munosabatlarga boshqa barcha huquqiy munosabatlar singari umumiy xususiyatlar xosdir. Soliq solish jarayonida turli-tuman munosabatlar vujudga kelib, turli huquq tarmoqlari bilan tartibga solinadi. Jumladan soliq solish sohasidagi aksariyat huquqiy munosabatlar konstitutsiyaviy, ma’muriy, moliya, bank va boshqa huquq tarmoqlarining normalari asosida vujudga keladi. Mazkur munosabatlar o‘rtasida soliq huquqiy munosabatlari alohida ahamiyat kasb etadi.

Soliq huquqiy munosabatlari – bu soliq huquqiy normalari asosida vujudga keladigan munosabatlardir. Soliq huquqiy munosabatlari o‘zining tuzilishiga ko‘ra, munosabat subyekti, obyekti va mazmuniga ega. Soliq huquqiy munosabatlarining subyekti bo‘lib, unda ishtirok etuvchi tomonlar, ya’ni soliq solish jarayonida ma’lum bir vakolatga ega bo‘lgan (davlat organlari, mansabdor shaxslar) yoki boshqacha soliqhuquqiy maqomiga ega bo‘lgan shaxslar (jismoniy shaxslar, yuridik shaxslar) hisoblanadi. Soliq huquqiy munosabatlarining obyekti bo‘lib esa, soliq huquqi munosabatlari subyektlarining harakatlari (qarorlari), ularning ijobiy yoki salbiy xulq-atvori hisoblanadi. Soliq huquqiy munosabatlarining mazmunini – soliq huquqi munosabatlari subyektlarining huquqlari, majburiyatlari, javobgarligi, taqiqlar, cheklovlar tashkil etadi. Soliq huquqiy munosabatlarining mazmuniga yuqoridagilardan tashqari, ularni amalga oshirish, ijro etish, ularga rioya etish va himoya qilishning protsessual-huquqiy tartibini ham kiritish mumkin. Demak, soliq huquqiy munosabatlari huquqiy munosabatlarning bir turi bo‘lib, o‘zining mazmuni, xususiyatlari va ishtirokchilari bilan boshqa huquqiy munosabatlardan ajralib turadi. Soliq huquqiy munosabatlarining o‘ziga xos xususiyatlari (yana bir konsepsiyaga binoan) quyidagilardan iborat bo‘lishi mumkin: a) bu munosabatlar – soliq solish sohasida vujudga keladi; b) bu munosabatlarning majburiy subyekti bo‘lib davlat nomidan ommaviy-huquqiy manfaatlarni ko‘zlab harakat qiluvchi davlat organlari hisoblanadi; v) bu munosabatlar - hokimiyat-bo‘ysinuvining mavjudligi hamda tomonlarning yuridik teng emasligi bilan tavsiflanadi; g) bu munosabatlar - ommaviy manfaatlarni qondirish maqsadida boshqaruv vazifalari va funksiyalarini amalga oshirish bo‘yicha vujudga keladi; d) bu munosabatlar - qonuniylikni ta’minlashning alohida huquqiy tartibi va o‘zining huquqiy himoyasi bilan ajralib turadi.

Soliq huquqiy munosabatlarining vujudga kelishi, o‘zgarishi va bekor bo‘lish asoslari: Harakatlar – bu huquq subyektlari tomonidan o‘z xohish-irodalarini ifodalashning natijasidir. Aksariyat soliq huquqi munosabatlari harakatlardan vujudga kelib, ular subyektning faol xulq-atvori bilan bog‘liq bo‘ladi. Harakatlar ikkiga bo‘linadi: a) qonuniy harakatlar – hamma vaqt soliq huquqi normalari talabiga mos keladi. Bunda yuridik fakt sifatida munosabat ishtirokchilarining qonunga muvofiq harakati namoyon bo‘ladi. Qonuniy harakatlar o‘z navbatida ikki ko‘rinishga ega: - davlat organlarining huquqiy aktlari. Huquqiy aktlar normativ yoki yakka (individul, ma’muriy) aktlarga bo‘linadi. Huquqiy aktlarda qonunga muvofiq harakatlar muayyan huquqiy oqibatlarni vujudga keltirishini nazarda tutib sodir etiladi. Bunday harakatlarda – huquq va majburiyatlarning vujudga kelishi, o‘zgarishi va bekor bo‘lishiga qaratilgan iroda ifodalanadi. Masalan, O‘zbekiston Respublikasi Soliq Kodeksi, “Soliq maslahati to‘g‘risida”gi O‘zbekiston Respublikasining Qonuni asosida soliq maslahati sohasidagi munosabatlar yuzaga keladi. Jumladan, soliq maslahatchilari tashkilotining yuridik va jismoniy shaxslarga mijozga shartnoma asosida soliq maslahati bo'yicha xizmatlar ko'rsatish borasidagi munosabatlari. “O‘zbekiston Respublikasining 2016 yilgi asosiy makroiqtisodiy ko‘rsatkichlari prognozi va Davlat budjeti parametrlari to‘g‘risida”gi O‘zbekiston Respublikasi Prezidentining Qarori asosida mazkur yil uchun tasdiqlangan stavkalar asosida soliq va boshqa majburiy to’lovlar undirib olish yuzasidan munosabatlar yuzaga keladi.

Soliq huquqiy munosabatlarining turlari. Soliq solish jarayonida vujudga keladigan ijtimoiy munosabatlar turli-tuman bo‘lib, ularni bir necha asoslarga ko‘ra tasniflash (guruhlash, turlarga bo‘lish) mumkin. Soliq huquqiy munosabatlarining vazifasi va funksional belgilanishiga qarab, ularni ikkiga bo‘lish mumkin: a) tartibga soluvchi munosabatlar, ya’ni huquq subyektlarining mo‘tadil xulq-atvori, huquqqa muvofiq xatti-harakatlarining natijasida vujudga keladigan munosabatlar; b) muhofaza qiluvchi munosabatlar, ya’ni huquqbuzarlikni sodir etish va bu uchun davlatning majburlov choralarini qo‘llash zaruriyati asosida vujudga keladigan munosabatlar. Soliq huquqi munosabatlarini shartli ravishda quyidagilarga bo‘lish ham mumkin: a) vertikal soliq huquqiy munosabatlari – soliq huquqi tartibga solishning mohiyatini ifoda etib, boshqaruv subyekti va obyekti o‘rtasidagi 52 subordinatsiyaviy aloqalarni anglatadi. Vertikal soliq huquqi munosabatlari aynan hokimiyat munosabatlaridir. Mazkur munosabatlar bo‘ysunuv mavjud bo‘lgan tomonlar o‘rtasida vujudga keladi hamda fuqarolik-huquqiy munosabatlardan farq qilgan holda, ularda tomonlarning tengligi mavjud emas. Vertikallik deganda – bir tomonda yuridikhokimiyat vakolatlari mavjudligini, ikkinchi tomonda esa bunday vakolatlarning mavjud emasligini yoki vakolat doirasi torroq ekanligi tushunish lozim. Soliq solish sohasida soliq huquqi munosabatlarining vertikalligini anglatuvchi quyidagi xususiyatlarni ko‘rsatib o‘tish mumkin: - vertikal munosabatlarning asosiy ko‘rsatkichi hisoblangan – “tomonlar tengsizligi”ning mavjudligi; boshqaruv subyektida yuridikhokimiyat vakolatlarining mavjudligi; - tomonlarning tengsizligi bir tomoning ikkinchi tomonga bo‘ysinishi, ya’ni “hokimiyat - bo‘ysinuv”ga asoslanishi; - soliq huquqi munosabatlarida bo‘ysunuv hamma vaqt ham aniq namoyon bo‘lmaydi; - vertikal xususiyatdagi aksariyat soliq huquqi munosabatlari bo‘ysinuv mavjud bo‘lmagan tomonlar o‘rtasida ham vujudga kelishi mumkin. Lekin bu holda ham, bir tomon o‘z vakolati doirasida o‘ziga bo‘ysunmagan ikkinchi tomon uchun majburiy bo‘lgan huquqiy aktni qabul qilishi mumkin; - soliq solish sohasida kontrol-nazorat faoliyati keng doirada amalga oshirilib, uning subyektlari sifatida davlat organlari (mansabdor shaxslar)ning o‘zi namoyon bo‘ladi. Demak, vertikal soliq huquqi munosabatlari turli ko‘rinishlarga ega bo‘lib, to‘g‘ridan-to‘g‘ri boshqaruv ta’sirini amalga oshirish hamda bir tomon yuridik-hokimiyat irodasining ustunligi bilan ifodalanadi. (Masalan, soliq xizmati organi bilan soliq to‘lovchi o‘rtasida yuzaga keladigan munosabatlar). b) Gorizontal soliq huquqi munosabatlarida bir tomonning ikkinchi tomonga nisbatan yuridik-hokimiyat irodasining ustunligi mavjud emas. Ma’lum bir ma’noda, gorizontal soliq huquqi munosabatlarida tomonlar teng hisoblanadi. Gorizontal soliq huquqi munosabatlari vertikal soliq huquqi munosabatlari singari ko‘p tarqalgan emas. Chunki ular qaysidir ma’noda soliq huquqi tartibga solish doirasidan chetga qolgan. Lekin soliq solish sohasida bunday munosabatlarning vujudga kelishi mumkin. Bu birinchidan, tomonlar o‘rtasida bo‘ysunuvning mavjud emasligi, tomonlarning bir xildagi huquqiy darajaga ega ekanligi, yuridik tenglikning formal emas, balki haqiqatda mavjud bo‘lishi;ikkinchidan, 53 boshqaruv munosabatlarida bu ikkala xususiyat (bo‘ysunuvning mavjud emasligi va yuridik tenglik)ning bir vaqtda mavjud bo‘lishi;uchinchidan, bir tomonning ikkinchi tomonga qaratilgan yuridik-hokimiyat irodasining bo‘lmasligi. Masalan, Davlat soliq qo‘mitasi va Moliya vazirligi o‘rtasida yuzaga keladigan munosabatlar, ya’ni soliqlarni yg‘ib olish yuzasidan ma’lum bir ko‘rsatma, nizom va boshqa qonun osti hujjtalarini birga qabul qilishi.

Soliq huquqiy munosabatlarning mohiyati – huquq layoqati tushunchasi, uning xususiyati, mazmuni va hajmi orqali yoritib beriladi. Soliq huquq layoqati va muomala layoqati – subyektlar soliqhuquqiy holatining asosini tashkil etadi. Subyektning huquq layoqati uning yuridik huquq va majburiyatlarini o‘z ichiga oladi. Odatda, u aniq bir shaxsning subyektiv huquq va subyektiv majburiyatga ega bo‘lish qobiliyatini anglatadi. Soliq huquq layoqati – bu ma’lum bir huquqlarga ega bo‘lish va majburiyatlarni bajarish, harakatlarni amalga oshirish va qarorlar qabul qilish, soliq qonunbuzilishlari bo‘yicha ishlarni ko‘rib chiqish, huquqiy normalarni buzish va qonun bilan o‘rnatilgan talablarga rioya etmaganlik uchun javobgarlikka tortilish qobiliyatiga ega bo‘lishdir. Shunday qilib, soliq huquq layoqati aniq bir soliq huquqiy munosabatlarining vujudga kelishida, mazkur huquqiy munosabatlar ishtirokchilarining aniq huquq va majburiyatlarga ega bo‘lishida xizmat qiladi. Soliq huquqi subyektlari tomonidan huquq va majburiyatlarning amalga oshirilishi – huquqiy munosabatlarni vujudga keltiruvchi yuridik faktlar bilan ta’minlanadi. Soliq huquqi normalari bilan o‘rnatilgan huquq layoqatiga ega bo‘lgan subyektlar, ularga berilgan huquq layoqatini amalda ro‘yobga chiqarishlari orqali, soliq huquqiy munosabatlarining ishtirokchilariga aylanadilar. Shu sababli, soliq huquqi subyektlari soliq huquqi layoqati bilan bir vaqtda soliq muomala layoqatiga, ya’ni ularga tegishli bo‘lgan soliq sohasidagi huquqlarni amalga oshirish qobiliyatiga ham ega bo‘lishi kerak. Jismoniy yoki yuridik shaxsning muomala layoqati – bu ularning o‘z qarorlari va harakatlari (harakatsizligi) bilan huquqlarga ega bo‘lishi 56 va amalga oshirishi, o‘zlariga va boshqa shaxslarga majburiyatlarni vujudga keltirishi, ularni bajarishi hamda fuqarolarning huquqlari va erkinliklarini ta’minlash qobiliyatiga ega bo‘lishidir. Soliq huquqi subyektlarida muomala layoqati turlicha vujudga keladi. Muomala layoqati vujudga kelishining asosiy sharti bo‘lib, subyektlar huquqlari, majburiyatlari va vakolatlarining xususiyatlari hisoblanadi. Muomala layoqatiga ega bo‘lishning huquqiy asoslari normativ huquqiy aktlarda o‘rnatiladi. Demak, jismoniy va yuridik shaxslarning, davlat organlari va davlat xizmatchilarining soliq huquqi subyekti sifatida namoyon bo‘lishi hamda soliq huquqiy munosabatlarida ishtirok etishi ko‘p jihatdan huquq layoqati va muomala layoqatining mavjudligiga bog‘liqdir. Masalan, yuridik shaxslar tashkil qilingan vaqtdan boshlab ham soliq huquqi subyekti, ham soliq huquqiy munosabat subyektlari bo‘lishi mumkin. Jismoniy shaxslar tug‘ilishlari bilan huquq subyekti bo‘ladilar, qachonki ularda soliq to‘lash majburiyati yuzaga kelganda ular munosabat subyektlariga aylanadilar. Jismoniy shaxslar soliq sohasida fuqarolik qonunchiligi bo‘yicha 14 yoshdan mustaqil daromadga yoki yoshidan qat‘i nazar mol-mulkka, yerga egalik qilib, mehnat huquqi normalari bo‘yicha esa 16 yoshdan yuridik salohiyatga ega bo‘ladilar, chunki shu davrdan boshlab ular tegishli soliq to‘lovlari obyekti bo‘lgan daromadlar va mulkning egalari bo‘lishi mumkin. Yuqorida ta’kidlab o‘tkanimizdek soliq huquqiy munosabat subyektlari bo‘lib soliq to‘lovchilar va vakolatli davlat organlari hisoblanadi. Bundan tashqari, soliq agentlari hamda soliq to‘lovchining vakillari ham soliq huquqiy munosabat subyektlaridir. Amaldagi soliq qonunchiligiga asosan, soliq to‘lovchilar – zimmasiga soliqlar va boshqa majburiy to‘lovlarni to‘lash majburiyati yuklatilgan jismoniy shaxslar, yuridik shaxslar va ularning alohida bo‘linmalaridir. Soliq agentlari – zimmasiga soliqlar va boshqa majburiy to‘lovlarni hisoblab chiqarish, soliq to‘lovchidan ushlab qolish hamda budjetga va davlat maqsadli jamg‘armalariga o‘tkazish majburiyati yuklatilgan shaxslardir. Soliq to‘lovchining vakillari esa qonunga yoki ta’sis hujjatiga muvofiq soliq to‘lovchining vakili bo‘lishga vakolatli shaxslardir.