Sirdaryo viloyati

Guliston - Sirdaryo viloyatining markazi. Guliston shahri 1961-yilda tashkil etilgan. Shahar bir necha qismga boʻlingan: 1, 2,3,4,5 mavzelar, "Ahillik", "Maxalla", "Suvchilar", "Doʻstlik qoʻrgʻoni","Ulugʻobod qoʻrgʻoni"(1985-yilda qoʻshilgan), "Yangilik". Shaharda juda koʻp koʻngilochar joylar, maʼdaniyat va istirohat bogʻlari, Olim Xoʻjayev nomli drama teatr, Guliston markaziy stadioni, Alpomish sport majmuyi, suzish havzalari , bolalar sport markazlari,madaniyat va maʼrifat markazi faoliyati koʻrsatishadi.
Guliston (1923 yil va 1952-60 yillarda shahar, soʻngra shaharchaga aylantirilgan, 1961 y. 8 maydan yana shahar) — Sirdaryo viloyatidagi shahar, viloyatning maʼmuriy, iqtisodiy va madaniy markazi. Mirzachoʻlning jan.-sharqida, 276 m balandlikda, "Doʻstlik" kanali sohilida. Toshkentdan 118 km. G.dan Toshkent—Xovos temir yoʻl oʻtgan. 1895 y.da endigina qurilayotgan Samarqand—Toshkent temir yoʻl yoqasida hozirgi G. oʻrnida dastlabki uylar qad koʻtargan edi. Keyinchalik u yerda ikkita qishloq paydo boʻlib, ularning birlashishidan Mirzachoʻl sh. (1961 yildan G. deb atalgan) vujudga keldi. Yiliga oʻrtacha 295–300 mm yogʻin yogʻadi, yanvarning oʻrtacha temperaturasi —2,5°, minimum temperatura —35°, iyulning oʻrtacha temperaturasi 28°, maksimum temperatura 45°. Aholisi 255,3 ming kishi (2017), asosan oʻzbeklar; shuningdek, qozoq, tatar, rus, koreys , tojik va b. millat vakillari ham yashaydi.
Sanoati paxta tozalash zavodi, paxta punkti, elevator, sut, yogʻ-ekstraksiya, non zavodlari, yaxna ichimliklar korxonasi, qishloq xoʻjaligi mashinalari va avtomashinalarni taʼmirlash ustaxonalari, qurilish materiallari kombinati, bosmaxona, maishiy xizmat koʻrsatish kombinati, "Peng-Sheng" O'zbekiston-Xitoy qo'shma korxonasi ,"Turkiston" qandolatchilik qoʻshma korxonalaridan iborat. Dori-darmon ishlab chiqariladigan "Lichava-Farmsanoat" Oʻzbekiston—Chexiya qoʻshma korxonasi qurildi. G.da Guliston universiteti, tibbiyot kolleji, kasb-hunar va sanʼat bilim yurtlari, qurilish kolleji, 16 umumiy oʻrta taʼlim maktabi, Sirdaryo teatri, kutubxona, pochta, telefon st-yasi bor. Poliklinika, viloyat markaziy kasalxonasi xizmat koʻrsatmoqda. Oʻn mingtomoshabinga moʻljallangan stadion mavjud.
Shaharda koʻp qavatli turar joylar, jamoat binolari, jumladan "Nikoh saroyi", suzish havzasi, sharqona uslubda qurilgan "Guliston" choyxonasi, akademik litsey, qoʻgʻirchoq teatri binolari va b. bunyod etildi. Shahar hududidan Jarqoq—Toshkent gaz quvuri oʻtgan. Viloyat markazidan barcha tuman markazlari va Toshkentga avtobuslar qatnaydi.[1]
Guliston shahrida 1 ta universitet, 2 ta akademik litsey va 5 ta kollej faoliyat yuritadi.
Guliston shahrida 1ta futbol klub mavjud.


Guliston 2-akademik litseyi O`rta maxsus kasb-hunar ta`limi Markazining 2007-yil 24-fevraldagi 30-sonli, Sirdaryo viloyati o`rta maxsus kasb-hunar talimi boshqarmsining 2007 yil 9-martdagi 44-sonli buyruqlari hamda Guliston shahar hokimining 2007-yil 4-iyundagi 313-qarori asosida tashkil etilgan bo`lib 2007-yilning 15-dekabrida foydalanishga topshirilgan.

Litseyning umumiy maydoni 3,6 ga bo`lib, unda 720 o`quvchi o`rinli asosiy va ikki blokli o`quv binosi, 150 o`rinli faollar zali, 30x18 m hajmdagi sportzal, 16 o`rinli bufet, axborot resurs markazi va avtonom qozonxona mavjud. Litseyda 25 ta fan xonasi (shundan 12 tasi to`liq guruhga, 13 tasi bo`linadigan guruhlar uchun) mavjud bo`lib, ular "Ta`lim to`g`risida"gi qonun va "Kadrlar tayyorlash milliy Dasturi" talablari asosida jihozlangan. Kimyo, biologiya va fizika fanlari bo`yicha zamon talablariga javob beradigan 5 ta laboratoriya xonasi, 4 ta lingafon xonasi ishlab turibdi. Mazkur laboratoriyalar Samarqanddagi "El-xolding" firmasi jihozlari bilan jihozlangan.