Сиддиқ МЎмин беморликда кечган туйғулар пайғамбар ёши

ЎНГ ВА ЧАП ҚЎЛЛАР


(Бемор шоир ҳазили)

Берганмисиз сира эътибор –

Фарқи бордир ўнг ва чап қўлнинг.
Ҳар бир қўлнинг ўз хислати бор,
Билмасангиз, хабардор бўлинг:

Чап қўл асли юракка яқин,

Шунинг учун доим иззатда.
Боқмоқ бўлиб эгасин, халқин
Ўнг қўл шўрлик доим хизматда.

Тинмай хизмат қилгани боис,

Бўртиб чиққан томирлари ҳам.
Чап қўл эса салгина ноқис –
Бир нарсани тутмайди маҳкам.
Мен булардан бўлдим хабардор
Ётганимда шифохонада.
Ҳамширалар бўлди “харидор”
Ўнг қўлимга – мард-мардонага.

Ўнг қўлга ниш урмоқ осонроқ,

Топиш мушкул чап қўл томирин.
Камситмоқчи эмасман, бироқ
Ҳамширалар биларкан сирин.

Шунинг учун улар доимо:

– Ўнг қўлингиз узатинг, – дейди.
Томиримдан киради шифо,
Ҳамширалар ҳеч аямайди.

...Гулнорага ўнг қўлим бердим,

Гулмирага чап қўлим қолди.
Қўлларимни бўлиб бердим-у
Муяссарга юрагим қолди.

Бу гапларим гарчи сал ҳазил

Ўнг ва чап қўл фарқин билайлик.
Ҳаётимиз ўтмасин маҳзун –
Баъзан ҳазиллашиб турайлик...


2019 йил 5 август
КАЙФИЯТ

Ким ундай ўйлайди, ким эса бундай,

Аслида бу нарса аёндир кундай.
Менинг бир жайдари фалсафам шундай:
Дунёда кайфият – энг сирли туйғу.

Кайфият соз бўлса, ҳамма ишинг соз,

Ҳатто қаҳратон ҳам бўлиб кетар ёз.
Гапимга қулоқ сол, дил лавҳингга ёз:
Дунёда кайфият – энг сирли туйғу.

Яна бир тилсимни айлайин баён:

Кайфият бўлмаса – ҳар нарса ёмон,
Суюкли рафиқанг – мисоли чаён,
Дунёда кайфият – энг сирли туйғу.

Кузатдим раҳбарлар жамиятини –

Доимо асрайди ҳамиятини.
Билиб кир ёнига кайфиятини –
Дунёда кайфият – энг сирли туйғу.

Тани сиҳатлик ҳам у билан боғлиқ,

Кайфият зўр бўлса, зўр бўлар соғлиқ.
Сендан узоқ турсин каландимоғлик,
Дунёда кайфият – энг сирли туйғу.

Кайфият бўлмаса, соқол олинмас,

Аёл ўсма қўйиб, сочин таролмас.
Йўлчи манзилига етиб боролмас:
Дунёда кайфият – энг сирли туйғу.

Ойлаб боролмайсан онанг ёнига,

Тегасан ҳаттоки боланг жонига,
У таъсир этади инсон ҳолига:
Дунёда кайфият – энг сирли туйғу.

Кайфият бор экан, шеър ўқияпсиз,

Чала жойларига сўз тўқияпсиз,
Ҳамроҳингиз нуқиб, ўқи, деяпсиз,
Дунёда кайфият – энг сирли туйғу.

Кайфият бўлмаса, шеър ёзармидим,

Шеърият баҳона дил ёзармидим.
Шу шеърни ёздим-у ўзим ҳам билдим:
Дунёда кайфият – энг сирли туйғу!..


2019 йил
6 август