«sharq» nashriyot-matbaa aksiyadorlik kompaniyasi

Sog‘in qo‘shiqlari

Ot oyog‘in ot bosar churey-churey,

Oq yuzindan gard bosar churey-churey,

Agar shuytib sog‘dirmasang churey-churey,

Qassoblar butingdan osar, churey-churey.

Og‘ziginangda o‘ting bor churey-churey,

Yelinginangda suting bor churey-churey,

Sersoqoling jonivor churey-churey,

Kerilib turgan buting bor, churey-churey.

O‘rim qo‘shiqlar

O‘rim payti — rizq payti,

Dangal o‘rib tashlaymiz,

Istiqlol shukrin aytib,

Davron surib yashaymiz.

O‘rog‘im olmos,

O‘rimdan qolmas,

Sira ham tolmas,

O‘rmasam bo‘lmas.

175

MAVSUM-MAROSIM QO‘SHIQLARI

Tog‘da toychoq kishnaydi,

Ot bo‘ldim deb yor-yor.

Uyda kelin yig‘laydi,

Yot bo‘ldim deb yor-yor.

Yig‘lama qiz, yig‘lama,

To‘y seniki, yor-yor.

Ostonasi tillodan,

Uy seniki, yor-yor.

Tog‘dan tutgan archani,

Sakkiz denglar, yor-yor

Sakkiz qizning sardori,

Keldi denglar yor-yor.

Sakkiz qizning sardori

Biz bo‘lamiz, yor-yor.

Sakkiz bog‘da ochilgan,

Gul-lolamiz, yor-yor.

O‘lanlar

O‘lanlarning avval boshi — tamal toshi,

To‘y oldidan tortganim so‘qim oshi,

Hadding bo‘lsa, qani kelib o‘lan boshla,

Bu elatning man-man degan keksa-yoshi!

Baland-baland tog‘larning qori bo‘lar,

O‘ngirida burgut, lochin sori bo‘lar,

O‘lanchilar manmansirab kerilmaydi,

Er og‘asi — mard yigitning ori bo‘lar.

Kelin salomlar

Bismillodan boshlaymiz,

Oshga jambil tashlaymiz,

Salom, salom, yana salom,

Avval xudoga salom.

Ko‘cha to‘la qo‘y bergan,

Mashina to‘la to‘y bergan,

Salom, salom, yana salom,

Qaynotasiga salom.

Qozon osgani eringan,

O‘g‘il tug‘dim deb kerilgan

Salom, salom, yana salom,

Qaynonasiga salom.

176

Oshga solgan ilikday,

Qoshu ko‘zi pilikday

Salom, salom, yana salom,

Ovsinlariga salom.

Tomga pichan tashlagan,

Orqa-o‘ngin qashlagan,

Salom, salom, yana salom,

Amakisiga salom.

Marsiyalar

Aytmay desam bo‘lmaydi,

Dog‘ingiz o‘ti qo‘ymaydi,

Ishongan bog‘im, voy otam,

Suyangan tog‘im, voy otam.

Qaldirg‘ochning qanotiga,

Qil bog‘lagan, voy otam,

Borsa kelmas joylarga

Bel bog‘lagan, voy otam!