Seminar mashg‘ulotlar mazmuni 1-mavzu: pedagogika nazariyasi fanining mazmuni, mohiyati va predmeti

SEMINAR MASHG‘ULOTLAR MAZMUNI

1-MAVZU: PEDAGOGIKA NAZARIYASI FANINING MAZMUNI, MOHIYATI VA PREDMETI.

1. 
   Pedagogika ijtimoiy fan sifatida.
   
2. 
   Pedagogikaning asosiy kategoriya va tushunchalari.
   
3. 
   Pedagogik fanlarning tuzilishi.
   
4. 
   Pedagogik fanlar tizimi.
   
5. 
   Ilmiy-pedagogik tadqiqot metodlariga tavsif.
   

“Pedagogika” tushunchasi qanday ma’noni anglatadi?
“Pedagogika” yunoncha “παιδαγωγική”; qadimgi grek tilidan “παῖς” (“pais”) – bola, “ἄγω” (“agogos”) – etaklayman degan ma’noni anglatadi. Umuman “pedagogika” tushunchasi “bolani tarbiyalayman”, “bolani kamolga etkazaman”, “shaxsni tarbiyalash san’ati” degan ma’nolarni anglatadi.
Pedagogika fani qanday fan?
Pedagogika – shaxsni shakllantirishga qaratilib, muayyan tizim asosida tashkil etiladigan faoliyat, ta’lim-tarbiyaning mazmuni, shakli, metod va vositalari haqidagi fan.
Pedagogika fani qanday fanlar turkumiga kiradi?
Pedagogika fani ijtimoiy fanlar turkumiga kiradi.
Pedagogika fanining maqsadi nima?
Pedagogika fanining maqsadi – shaxsni har tomonlama rivojlantirish, unda yuksak ma’naviy-axloqiy sifatlarni tarbiyalash, muayyan faoliyat ko‘nikma va malakalarini shakllantirish sanaladi.
Pedagogika fanining ob’ekti nimadan iborat?
Pedagogika fanining ob’ekti shaxsni har tomonlama rivojlantirish, unda ilmiy bilimlarni hosil qilish, dunyoqarashni shakllantirish, yuksak ma’naviy-axloqiy sifatlarni tarbiyalash jarayonidan iborat.
Pedagogika fanining predmetini nima tashkil etadi?
Pedagogika fanining predmetini har tomonlama rivojlangan, barkamol avlodni tarbiyalash jarayonining umumiy mohiyati, qonuniyatlari, ustuvor tamoyillari, ta’lim muassasalarida tashkil etiladigan pedagogik faoliyat mazmuni, pedagogik hodisalar tashkil etadi.
Pedagogika fanining asoslari nimalardan iborat?
Pedagogika fanining asoslari ta’lim va tarbiya jarayonining mazmuni, tamoyillari, qonuniyatlari, bosqichlari, samarali shakllari, metodlari, vositalari, texnologiyalari, o‘qituvchi hamda ta’lim oluvchi (o‘quvchi, talaba) munosabatlari, ta’lim oluvchilar faoliyatini nazorat qilish va baholash, ta’lim-tarbiya jarayonlarining natijalaridan iborat.