«Саноатдаги вибрацион жараёнлар ва жиҳозлар»

Муаллифлар: кат.ўқ. Садуллаев Х.М.
кат.ўқ. Хурсанов Б.Ж.
кат.ўқ. Эргашев Н.А.
Тақризчи: доц. Ботиров А

1-АМАЛИЙ МАШҒУЛОТ


Мавзу: Тебраниш ҳосил қилиш жараёнлари ва жиҳозларини ҳисоблаш.
(Ишнинг давомийлиги 4 - соат)

Саноатда вибрацион жараёнлар ва жиҳозлар жуда кенг миқёсда, жумладан: қурилиш, қурилиш материаллари ишлаб чиқариш ва бошқа кўпчилик тармоқларда хилма-хил қўлланишга эга.

Умумий қўлланишга эга вибрация ҳосил қилувчилар кўп миқдорда ишлаб чиқарилмокда. Темир - бетон буюмлар ва арматураланмаган бетон буюмларни вибрацион усул билан зичлаш ва қолиплаш биринчи ўринни эгаллаб туради. Вибрацион саралаш машиналари кўплаб қурилиш объектларида, карьерлар ва шунга ўхшаш корхоналарда ишлатилиб келинмоқда.
Саралаш жараёни саноатнинг кўп тармоқларида кенг қўлланилади.
Тоғ жинсларининг ва майдаланган материалларнинг ўлчамлари бир хилда бўлиши қийин, шу сабабдан материаллар сараланади. Материаллар таркибидаги сифатини бузувчи жисмлар чиқариб ташланади. Материалларни саралаш машиналари қуйидаги усуллар бўйича ишлайди:
- Механик усул
- Гидравлик усул
- Ҳаво ёрдамида (аэродинамик усул)
Материалларни саралашнинг энг кўп тарқалган усули механик усулдир. Бу усулда асосан сараловчи машиналардан фойдаланилади. Элакка келаётган турли ўлчамдаги аралашма берилган материал дейилади. Берилган материал доналари элак тешиклари диаметридан катта бўлса элак юзаси устида қолади ва «элак усти синфи» дейилади (+ ишораси билан белгиланади). Элакдан ўтган материал «элак ости синфи» дейилади (-ишораси билан белгиланади). Масалан, 40 мм тешикли элакдан ўтмаган материал +40, ўтгани эса –40 бўлади. Агар материал n - та элак юзасидан ўтаётган бўлса n+1 синфга бўлинади. Саралаш машиналарнинг материал тўқилувчи юзалари колосникли панжара ёки сетка кўринишида бўлади ва горизонтал текисликка нисбатан параллел ёки қия ҳолатда бўлади. Элакнинг материални саралаш юзаси ҳаракатланиш турига кўра айлана, эллипс ва тўғри чизиқ шаклида бўлади.
Қия, яъни горизонтал текисликка нисбатан бурчак остида ўрнатилган саралаш машиналарида шу уч хил кўринишидаги траектория мавжуд. Горизонтал ҳолатдаги саралаш машиналарида тўғри чизиқли ҳаракатда бўлади. Сараловчи юзанинг титраш тезлиги шундай танланади-ки, материал юзадан кўчсин. Материалини қайта ишлашда қуйидаги кўринишдаги саралаш ишлари олиб борилади: