Sanoat ishlab chiqarishini tashkil etish

Aktsizosti mahsulotlar – ularga nisbatan aktsizlar o’rnatilgan (belgilangan) mahsulotlar. (Qarang: Aktsizlar).
Advalor soliq - mahsulot qiymatiga nisbatan qat’iy foiz stavkasida o’rnatilgan to’lov. Inflyatsiya sharoitida o’zining funktsiyalarini avtomatik ravishda saqlab qoladi. Bu soliqning tarkibiga savdo soliqlari, importga nisbatan ko’pgina bojlar va boshqalar kiritilishi mumkin. Mahsulotlarni (jumladan, import mahsulotlarini ham), jismoniy va yuridik shaxslarning mulklarini soliqqa tortishda qo’llaniladi.
Asosiy fondlarni realizatsiya qilishdan olingan foyda – hukumat tomonidan belgilangan tartibda hisoblangan, inflyatsiya indeksiga oshirilgan (ko’paytirilgan) asosiy fondlarning sotish bahosi va ularning dastlabki yoki qoldiq qiymati o’rtasidagi farq.
Auditorlik nazorati - auditorlik faoliyatini amalga oshirish borasida litsenziyaga ega bo’lgan auditorlik firmasi tomonida o’tkaziladigan mustaqil noidoraviy moliyaviy nazorat. Asosiy vazifasi buxgalteriya hisoboti va moliyaviy hisobotning haqqoniyligi, to’liqligi va ishonchligi hamda moliyaviy qonunchilikka qay darajada rioya qilinganligini aniqlash (o’rnatish)dir. Banklar, sug’urta tashkilotlari, birjalar, nobyudjet va xayriya fondlari, ochiq tipdagi aktsionerlik jamiyatlari, xorijiy kapital ishtirokidagi korxonalar, shuningdek, prokuratura va davlat nazorat organlarining topshirig’iga binoan har qanday korxona va tashkilotlar majburiy ravishda auditorlik nazoratidan o’tkazilishi kerak. Auditorlik firmalari buxgalteriya hisoboti va soliq hisob-kitoblari, hisob ishlarini yuritish, loyihalarni moliyaviy ekspertiza qilish va h.k.lar bo’yicha maslahat xizmatlarini ko’rsatishi mumkin. Ularning bu xizmatlari tegishli to’lov (haq) asosida amalga oshiriladi.
Aholiga transfertlar – aholiga to’lanadigan majburiy to’lanmalarni (mamlakat qonunchiligiga muvofiq ravishda o’rnatilgan pensiyalar, stipendiyalar, nafaqalar, kompensatsion va boshqa ijtimoiy to’lovlarni) moliyalashtirish uchun mo’ljallangan byudjet mablag’lari.