Республика илмий-амалий масофавий онлайн конференцияси

«Балиқ скелети» технологияси
Ушбу технология балиқ модели чизмаси орқали намойиш этилиб, бунда ўқувчилар ўртага ташланган муаммони ҳар томонлама очиб беришга ҳаракат қиладилар. Балиқ скелети чизмаси ватманга чизилиб, унинг тепа қисмига ечилиши керак бўлган муаммо ёзилади. Пастки қисмига муаммони ҳал этилиш йўллари ёзиб борилади. Бу усул орқали биз ўқувчиларни мустақил, ижодий, танқидий фикрлашга ўргатамиз. Ҳар қандай муаммоларни ечишнинг бир қанча вариантларини топиш мумкинлиги ҳақидаги билим, кўникма ва малакага эришишларини таъминлаймиз. Масалан, йўл ҳаракати қоидалари дарсларида «Светофор нима учун керак?» муаммоси қўйилса, болалар ўз фикрлари билан скелетни бойитиб борадилар.
Ўқувчилар балиқнинг ҳар бир скелетига светофор нима учун кераклигини ёзиб борадилар.

Светофор нима учун керак?
	Йўловчиларга йўлдан ўтиб олишлари учун
	Ҳалокатларни олдини олиш учун
	Йўл патрул хизматчиларининг ишини бирмунча осонлаштириш учун
	Йўл ҳаракати қоидаларига амал қилиш учун
	Катта кўчаларда машиналар тартибини бошқариш учун ва ҳоказо.

Ушбу технологияни табиатшунослик, она тили, математика, одобнома, умуман, бошланғич синфларнинг барча дарсларида қўллаш мумкин. Масалан, ўқиш дарсларида мавзу матнида воқеа ривожи бўйича болаларга шундай вазифа берилса, болалар матндаги воқеаларнинг учта кетма-кетлигини ва бўлмаган воқеанинг бир кўриниши бўйича ўз фикрларини ёзишлари мумкин. Болаларнинг бу технология орқали ижодий фикрлаш кўникма ва малакалари ривожланади.