Республика болалар ижтимоий мослашуви маркази

“Фазилатнинг устунлиги”

Машқнинг мақсади: Ўқувчиларда тушуниш қобилиятининг намоён бўлиш хусусиятларини аниқлаш.
Ўйин бориши. Бошловчи ҳар бир иштирокчи қўлига алоҳида карточкаларда “ташкилотчи”, “лидер”, “бошқарувчи” сўзларини бериб чиқади. Сўзлардаги ҳарфлар вертикал кўринишда ёзилган бўлиб, иштирокчи ҳар бир ҳарфнинг рўпарасига ўша билан бошланадиган ўзидаги шахсий сифатларни кўп ўйланмай ёзиб чиқиши керак.

“Кўприк”

Машқ мақсади: Уюшган жамоани яратиш, ўқувчиларда бир- бирини қўллаб-қувватлаш, бир-бирига ёрдам беришни шакллантириш, мулоқотдан новербал воситаларни ривожлантириш.
Иштирокчилар айлана бўлиб жойлашадилар, ўртада жойлашган иштирокчи бўр билан диагонал чизиқ чизилади. Ўйин шартини у қуйидагича тушунтиради: “Бу чизиқни тоғ дарёсидаги кўприк деб тасаввур қилинг. Кўприкнинг бир томонига фақат бир киши ўтиши мумкин. Ўйиндаги вазифа шундан иборатки, бир-бирига қарама-қарши турган йўналишда ҳаракат қилаётган икки киши кўприкдан ўтишлари зарур, ким уриниб кўришни ҳоҳлайди?” Гуруҳ ичидан ҳоҳишга кўра икки иштирокчи чиқади. Бу вазифанинг ечими олдиндан муҳокама қилинмайди, иштирокчилар кўприк бўйлаб бир-бирига қарама-қарши ҳаракат қиладилар. Улар учрашганда бир дақиқадан ортиқ гаплашмасдан энг кам сўз ишлатиб, келишлари зарур. Натижаларни муҳокама қилишда
қуйидагиларга эътибор берилади: коммуникатив вазифани бажаришда ким ташаббус намоён қилади, ўйин иштирокчилари бир-бирларига ёрдам берадиларми ёки, аксинча шериги ҳақида ўйламай фақат мақсадини амалга оширишга уринишадими? Бундай шартли, хавфли вазиятда қандай воситалар маҳсулдор ҳисобланади?

“Ҳужумчи” ва “Ҳимояланувчи”

Мақсад: ўз нуқтаи назарини фаол ҳимоя қилиш кўникмасига эга бўлиш малакасини шакллантириш.
Иштирокчилар гуруҳга иккитадан бўлиниб бир-бирларига қарама- қарши ўтириб олган ҳолда, аввал “ҳужумчи” кейин “ҳимояланувчи” ролида ўз фикрларини уқтиришга ҳаракат қиладилар. Сарфланадиган вақт: 50 дақиқа.

“Ишончли йиқилиш”

Мақсад: ўзаро таъсир малакаларини шакллантириш; гуруҳ аъзолари орасида ишонч ҳиссини уйғотиш. Иштирокчилар қўлларини маҳкам ушлаган ҳолда катта доира ташкил этадилар. Доира марказида турган иштирокчи кўзлари юмуқ ва бўшашган тарзда уларнинг қўлига йиқилади. Сарфланадиган вақт: 15 дақиқа.