Qurilish materiallari

Betonning sifatini nazorat qilish
Beton ishlarining sifati ishlab chiqarishning barcha bosqichlarida quyidagicha nazorat qilinadi:
-Beton komponentlari sifatini tekshirish;
-Komponentlarni to’gri dozalash (o’lchash);
-Qorishmaning aralashtirilishi, quyilishi va zichlanishini nazorat qilish;
-Betonning qotishini nazorat qilish;
-Qotgan betonning mustahkamligini aniqlash.


6.6.5. Og'ir betonning ishlatilishi


Og'ir beton, asosan, temirbeton va armaturasi avvaldan taranglangan temirbeton konstruksiyalar tayyorlashda ishlatiladi. Siqilishdagi mustahkamligiga nisbatan og'ir beton quyidagi loyiha markalarga bo'linadi: M50, M75, M100. M150, M200, M250, M300, M350, M400, M450, M500, M600, M700 va M800. Yuqori markadagi betonlar (M500-M800) armaturasi avvaldan taranglangan konstruksiyalarni tayyorlashda ishlatiladi. Armaturasi avvaldan taranglangan temirbetonning kirishishi va yuk ta'sirida vaqt bo'yicha deformatsiyalanishi kam bo'ladi.

O'ta yuqori markadagi betonlar M600 -M1000 yuqori markali portlandsement, yuqori sifatli to'ldirgichlar asosida tayyorlanadi,S/S_m=0,27-0,45 bo’ladi. Ular majburiy aralashtiradigan beton qorgichlarda tayyorlanadi, aralash usullarda (yuk ostida titratish, titratish-presslash va shu kabi) zichlashtiriladi. Yuqori markadagi betonlarni ishlatish konstruksiyaning o'lchamlarini kamaytiradi, armaturani 10-12% tejaydi, boshlang'ich sutka normal sharoitda mustahkamligi tez o'sgani uchun termoishlovga zarurat bo'lmaydi.
Og'ir betonning cho'zilishdagi mustahkamligi quyidagicha (kgs/sm²): 10, 15, 20, 25, 30, 35, 40. Bu omil yo'l va aerodrom qoplamalari, gidrotexnik beton va boshqa maxsus beton turlarini olishda muhimdir. Og'ir beton yedirilishga, radioaktiv nurlarga, biologik muhitlarga, sovuqqa va issiq harorat ta'siriga bardoshli.
Mayda donali beton yupqa va armosement konstruksiyalar tayyorlashda ishlatiladi. Uning tarkibida yirik to`ldirgich bo'lmasligi sababli sementning miqdori ko'payadi, shu sababli kirishishi va yukdan vaqt bo'yicha deformatsiyalanishi yuqori bo'ladi.