Qaraqalpaq tili mámleketlik til. Qaraqalpaq jazıwı hám onıń tariyxı Joba

Kásiplik awqam shólkemi

Isenim xat - qanday da bir mekeme, shólkem yaki bir adamnıń isenim bildiriwshiniń ekinshi bir adamǵa (isenim bildirgen adamına) belgili jumıslardı atqarıwǵa yamasa materiallıq baylıqlardı alıwǵa huqıq beriletuǵınlıǵı haqqında gúwalıq beriwshi jazba hújjet.

Óziniń xızmeti boyınsha isenim xatlar eki toparǵa bólinedi rásmiy túrdegi isenim xatlar hám jeke puqaralar tárepinen beriletuǵın isenim xatlar.

Rásmiy túrdegi xatlarda olardıń múddeti kórsetilgen boladı. Olar bir neshe jılǵa shekem bolǵan (úsh jıldan artıq bolmaydı) múddet ushın beriliwi múmkin. Eger isenim xatta múddeti anıq kórsetilmegen bolsa, bunday jaǵdayda ol berilgen kúnnen baslap bir jıl dawamında óziniń kúshin saqlaydı. Berilgen kúni kórsetilmegen isenim xat haqıyqıy emes.

Rásmiy túrdegi isenim xatlar, ádette, tipografiyalıq usıl menen orınlanǵan blanklerde (qaǵazda) jazıladı. Eger arnawlı blankler bolmaǵan jaǵdayda isenim xatlar ápiwayı qaǵazǵa jazıladı hám onıń joqarı shep qaptalına isenim xat beriwshi mekemeniń tórt múyeshli móri basıladı.

Rásmiy isenim xatlar tómendegi bólimlerden turadı

1. Isenim xattı beriwshi mekemeniń atı.

2. Isenim xattıń qatar sanı hám berilgen waqtı (sánesi).

3. Isenim xat berilip atırǵan adamnıń lawazımı hám tolıq atı (ismi, ákesiniń atı, familiyası).

4. Qımbat bahalı buyımlar alınatuǵın mekemeniń atı.

5. Isenim xattıń beriliw sebebi.

6. Isenim xattıń háreket etiw múddeti.

7. Isenim xat berilip atırǵan adamnıń qoyılǵan qolı.

8. Materiallıq buyımlardı alıwshınıń kim ekenligin tastıyıqlawshı hújjettiń atı (pasport).

Isenim xattıń bólimleri anıq, ózgertiwsiz yamasa dúzetiwlersiz rásmiylestiriliwi kerek.

Isenim xattıń ekinshi túri - bul jeke, yaǵnıy ayırım adamlar tárepinen basqa bir adamǵa belgili bir jumıstı orınlaw ushın isenim bildirip berilgen jazba hújjet.

Jeke isenim xatlardıń eń kóp tarqalǵan túri - bul aqsha (aylıq, napaqa hám basqalar) alıw ushın jazılǵan isenim xat.

Jeke isenim xat, ádette, qol menen jazıladı hám onda tómendegi zárúrli bólimler bolıwı shárt

1. Hújjettiń atı (İsenim xat).

2. Isenim bildiriwshiniń tolıq atı (ismi, ákesiniń atı, familiyası).

3. Isenim xat berilgen adamnıń tolıq atı (ismi, ákesiniń atı, familiyası).

4. Isenim xattıń mazmunı (tapsırılǵan wazıypalar anıq kórsetiledi).

5. Tapsırılǵan wazıypalar ámelge asırılıwı zárúr bolǵan mekemeniń atı.

6. Isenim bildiriwshiniń qolı.

7. Berilgen (yamasa jazılǵan) waqtı (sánesi).

8. Isenim bildiriwshiniń qoyǵan qolın tastıyıqlaǵan adamnıń lawazımı hám qolı.

9. Isenim bildiriwshiniń qoyǵan qolı tastıyıqlanǵan sáne hám dóńgelek mór.