Пул маблағлари ва ҳисоб-китоблар ҳисоби

Қопланган ва қопланмаган аккредитивлар чақириб олинадиган ва чақириб олинмайдиган бўлиши мумкин. Унинг матнида ушбу белги бўлмаган ҳолатда аккредитив чақириб олинувчи хисобланади.

Чақириб олинувчи аккредитив банк-эмитент томонидан маблағ олувчи билан олдиндан келишиб олинмасдан ҳам ўзгартирилиши ёки бекор қилиниши мумкин. Аккредитивни чақириб олиш маблағ олувчи олдида банк-эмитент учун қандайдир мажбуриятларни пайдо қилмайди. Тўловчи маблағ олувчига чақириб олинадиган аккредитивнинг шартларини ўзгартириш ёки бекор килиниши тўғрисидаги барча фармойишларни факат банк-эмитент орқали бериши мумкин, ушбу банк эса маблағ олувчининг банкига хабар беради, охиргиси эса - маблағ олувчига хабар беради.

Ижрочи банк чақириб олинувчи аккредитив бўйича тўловларни ва бошқа операцияларни амалга оширишга мажбур, агар аккредитивни ўзгартириш ёки бекор қилиш тўғрисидаги хабарнома олинмаган бўлса.

4. Касса муомалаларини ҳисобга олиш

Ўзбекистон Республикаси Марказий банки бошқаруви томонидан тасдиқланган (24.01.1998 й. 376-сон (1/16-сон баённома, АВ рўйхат рақами 22.06.2015 йилдаги 2687-сон, кейинги ўринларда - Қоидалар)) “Юридик шахслар томонидан касса операцияларини юритиш ҚОИДАЛАРИ”га асосан ташкил қилинади ва юритилади.

Ташкилотлар ўз кассаларида улар томонидан белгиланган лимитлардан ортиқча нақд пулни иш ҳақи, мукофотлар, ижтимоий суғурта бўйича нафақалар, стипендиялар, пенсияларни тўлаш учун ва банк муассасасида пул олинган кунни ҳисоблаганда, фақат 3 иш кунидан ошмаган муддатга (банк муассасаларидан анча олисда жойлашган ташкилотлар учун - 5 иш кунигача) сақлаш ҳуқуқига эгалар.

Ташкилотлар кассасидан нақд пул берилиши чиқим касса ордерлари ёки тегишлича расмийлаштирилган бошқа ҳужжатлар (тўлов қайдномалари, пул бериш бўйича аризалар, ҳисобварақлар ва ҳоказолар) бўйича, ушбу ҳужжатларга чиқим касса ордерининг реквизитлари бўлган штамп қўйилган ҳолда, амалга оширилади. Пул беришга доир ҳужжатлар ташкилот раҳбари ва бош бухгалтери ёки улар ваколат берган шахслар томонидан имзоланган бўлиши керак.