Programmalastırıw júda qızıqlı hám hár tárepleme paydalı bolǵan taraw. Programmalastırıwdı úyreniw oǵada ańsat, óytkeni házirgi kúndegi zamanagóy programmalastırıw tilleri ingliz tili tiykarında dúzilgen

Kirisiw

Programmalastırıw júda qızıqlı hám hár tárepleme paydalı bolǵan taraw. Programmalastırıwdı úyreniw oǵada ańsat, óytkeni házirgi kúndegi zamanagóy programmalastırıw tilleri ingliz tili tiykarında dúzilgen. Qunt, qızıǵıw hám jańa bilimlerdi iyelew arqalı hár kim progammist bola alıwı múmkin. Aytıp ótiw kerek, házirgi kúnde kúndelikli jumıs kúninde kompyuter texnologiyalarınan paydalanbaytuǵın tarawlar sanı az bolsa kerek. Qosımsha qılıp aytıwımız kerek, kompyuter arqalı islenetuǵın jumıslardıń kóp bólimi web saytlar, internet penen baylanıslı.

Bilimlendiriw tarawınan alıp qaraytuǵın bolsaq, sońǵı waqıtlarda aralıqtan oqıtıw sistemasına ayrıqsha kewil bólinip atır. Qaraqalpaq mámleketlik universiteti Elektron oqıtıw sistemasında da studentlerdiń aralıqtan oqıwı hám tálim alıwı ushın kóp ǵana múmkinshilikler jaratılǵan. Bul universitet kólemindegi elektron oqıtıw sisteması, bunnan basqada shet el saytlarınan kóplep dizimlerdi keltirip ótiwge boladı. Házirgi kúnde bilim alaman, qanday da bir kásip mamanlıǵın iyeleymen degen oqıwshıǵa internet kóp múmkinshiliklerdi ashıp beredi. Bazı birleri hátteki oqıǵan hám kurstı tamamlaǵannan keyin sertifikat alıwdı da usınıs etedi. Bulardıń qatarında «One million Uzbek coders» joybarın ayırıqsha atap ótiw tiyis bolıp esaplanadı.

Tiykarın izertlep qaraǵanımızda da, bul aralıqtan oqıtıw sistemalarınıń hámmesi web texnologiyalar tiykarında jaratılǵanın kóriw múmkin.

Web programmalastırıw browzerińiz arqalı kóriwińiz hám paydalanıwıńız múmkin bolǵan bárshe web texnologiya quramların óz ishine aladı. Web programmalastırıw júda qızıqlı hám kóp dáramat keltiretuǵın taraw esaplanadı. Tájiriybeli web programmistlerge bolǵan talap búgingi kúnde bir qansha joqarı bolıp turıptı.

Eger qashan bolsa da web programmalastırıwdı úyreniw haqqında oylaǵan bolsańız, búginnen baslaw eń qolaylı máwrit eń durıs waqtı!

Hár bir kúnnen, hár bir máwritten durıs paydalana biliw kerek. Házirgi dáwirdiń tiykarǵı talaplarınıń biri de web programmalastırıwshılar bolıp esaplanadı.

Prezidentimiz Shavkat Mirziyoyev Parlamentke múrájátinde, informaciya-kommunikaciya texnologiyaları (IKT¹) rawajına ayırıqsha itibar qaratıw, jaqın jıllar ishinde respublikanı rawajlandırıwdıń baslı jónelislerinen biri ekenin atap ótti. Keń jámáátshilik názerine usınıs etilgen keń kólemdegi «Raqamli O’zbekiston - 2030» baǵdarlaması mámleket ekonomikasın tolıq ózgertiw hám onın xalıq aralıq maydanda básekilesligin asırıwǵa qaratılǵanın baqlaw qıyın emes. Sonlıqtan-da, bul tarawda kózge kórinerlik nátiyjeler az, biraq programmistler ushın imkaniyatlar kóp.

Ásirese, SMM² házirgi kúnniń tiykarǵı dáramat dereklerine aylanıp atırǵanı kópshilik ushın jańalıq emes!

I. BAP: WEB TEXNOLOGIYALAR

Internet tariyxína bir názer

Internettiń payda bolıwı 60-jıllar aqırına barıp taqaladı. Amerika húkimeti tárepinen eń dáslep 1969-jılı ARPANet³ kompyuter tarmaǵına tiykar salınadı. 1957-jılı Sovet húkimetiniń birinshi jerdiń jasalma joldası ushırılǵanına juwap retinde, DARPA⁴ tarmaǵı jaratıladı.

1^ IKT - Informaciya-kommunikaciya texnologiyaları

2^ SMM - Sociallıq media marketing (Social Media Marketing)

3^ ARPANet - Advanced Research Projects Agency Network, jedel izertlewler joybarları agentligi tarmaǵı

4^ DARPA