Páninen “Baslawısh klaslarda tiykarǵı shamalar hám olardıń όlshem birliklerin úyretiw metodikası”

4. Waqıt ólshem birlikleri kestesi hám tiykarǵı waqıt penen tanıstırıw.

4-klassta waqıt ólshemleri temasın ótkende jıl, ay, hápte, sutka, saat, minut sıyaqlı ólshem birlikleri haqqında túsinik beriledi.Kórgizbeli túsinik beriw ushın saat hám onnan paydalanıwǵa keńirek toqtaw kerek.

Temanıń úyreniwdiń tiykarǵı wazıypası balalardı waqıt birlikleri hám olardıń múnásebetleri menen tanıstırıw, waqıt saat boyınsha anıqlawǵa úyretiwden ibarat.

Olarǵa minut, sekund, saat, kún, hápte, ay, jıl sıyaqlı waqıt ólshemlerin úy sháriyatında úyrenip keliw tapsırıladı.

Birinshi klasstıń  tayarlıq dáwirinde aq aldın  keyin túsinikleri kiritiledi. Máselen, tórt máwsimge baylanıslı  súwretli  kórgizbeden  paydalanıp, qaysı máwsim aldın keledi, qaysısı keyin keledi, degen sorawlardı túsindiriw múmkin.

1-klasstan  baslap, tań, kúndiz, keshqurın, tún, búgin, keshe, erteń túsinikleri menen tanısadı.Klassta kalendardan paydalanıw, sol tiykarında hápte, ay, jıl sıyaqlı olardıń arasındaǵı  baylanıstı úyreniw múmkin.

Waqıt ólshemleri teması boyınsha sabaqlarda  adamlar turmısında qanday rol` atqarıwın, kishkene bópelerden  ǵarrılıqqa shekem ótken aralıqtaǵı  jası boyınsha  basqıshlardı túsindiriw gúrrińlesiw shólkemlestiriw múmkin.

Klasta waqıttıń ólshew ásbapları: saat hám sekundomerler bolıwı maqsetke muwapıq.Kóbirek esaplaw islerinde saat tsiferblatınıń bolıwı shárt. Waqıttı esapqa alatuǵın tómendegi qollanbalar haqqında túsinikler beriw múmkin:

1.Tabel`-kalendar.

2.Saattıń demonstratsion modeli (tsifrblat).

3.Mektep oqıwshısınıń kúndelik rejimi kesteleri.

Sonday-aq, sekund hám ásir menen tanısadı. Oqıw jılınıń aqırında tómendegi waqıt ólshewleri kestesi beriledi.