Pán: Ádebiyat Klass: 6 Waqtı

III.Taza tema túsindiriw: (15 minut) Tolıbay Qabulovtıń ómiri hám dóretiwshiligi. “Álem ibrat alar hayal-qızlardan” qosıǵı
Qaraqalpaqstan xalıq shayırı Tolıbay Qabulov 1939-jılı 10-mayda Qaraózek rayonınıń Qarabuǵa awılında, diyqan shańaraǵında tuwılǵan. Ol Nókis awıl xojalıq texnikumın, Qaraqalpaq mámleketlik pedinstitutın pitkerip, «Qaraqalpaqstan» baspasınıń bólim baslıǵı, bas redaktordıń orınbasarı,
jazıwshılar awqamınıń juwaplı xatkeri, «Ámiwdárya» jurnalınıń bas redaktorı, Qaraqalpaqstan Málimleme agentliginde redaktor lawazımında jumıs isleydi.T. Qabulov qaraqalpaq ádebiyatında talantlı lirik shayır, sheber awdarmashı sıpatında tanıldı. Onıń lirikalıq qosıqları «Qarabuǵa», «Pátulla zor», «Sen tuwılǵan aqsham», «Sen meni qutlıqla», «Pándiwnásiyat» degen at penen toplamları basılıp shıqtı.Shayırdıń qaraqalpaq tilinen tısqarı ózbek, rus tillerinde onnan aslam kitapları basıldı. T. Qabulov óz dóretiwshiliginde lirikalıq qosıqlar menen birge epikaliq janrda poemalar, balladalar, balalar ushın ertek-poemalar dóretti.
Álem ibrat alar hayal-qızlardan
Ana — tawıs tań aldında taranǵan,
Ana — dawıs álem boylap taralǵan,
Ana — omir materiyanıń máńgilik,
Racional dánesi bop jaralǵan.

Tariyxın bilemiz batır, dananıń,

Ájayıp oylardıń, aqıl-dananıń,
Barlıǵı hátteki ay hám, juldız hám,
Binyat bolǵan aq sútinen ananıń.
Ana — aqqan dárya, ájayıp jáhán,
Ana — nur jadırap atıp turǵan tań.
Ol — ómir hám mehribanlıq saǵası,
Álem ibrat alar hayal-qızlardan.

Búgingi biypayan baǵlar, dalalar,

Búgingi abadan, awıl-qalalar,
Barlıǵı-barlıǵı, mehrińizden,
Binyat bolıp gúllep atır dalalar!

Búgin siz qulpırǵan bir dúnya bolıp,

Bir júrekten soǵıp, tolqıp turıpsız,
Búgin shayırlıqtan Zulfiya bolıp,
Dúnyaǵa mushayra oqıp turıpsız.

Birińiz duwtarǵa tillá tar bolıp,

Qosıqqa qushaqtı ashıp turıpsız,
Bárińizge Quyash, baǵ-ıǵbal bolıp,
Shiyrin zibannan dúr shashıp turıpsız.

Dúnya kórsin danıshpan, dananı,

Gúllendirsin dep sahranı, dalanı,
Ashıq aspan, saqıy quyash, nurlı kún,
Bul ómirge sıylıq etken Ananı!

Biri — márt paxtakesh, biri — márt shopan,

Biri — qurılısshı, al biri maman,
Olardıń nur tókken sawlatlarınan,
Búgin ibrat alıp turıptı jáhán.