Piri Turkiston 63 yoshida yer ostiga kirishi sababini quyidagicha izohlaydi

Rivoyatlarga ko‘ra, Rasuli akram Muhammad alayhissalom 63 yoshida foniy dunyodan boqiy dunyoga rixlat etish oldidan as’hoblarini chaqirib”:Qay biringiz omonatimni(islom dini ramzini) kelgusi izdoshlarga yetkizgaysiz?”,- deb so‘raganlar. Shunda avliyo Arslon Bob bu yumushni zimmasiga olgan. Rivoyatga ko‘ra, o‘sha paytda sayyoh darvesh(qalandar) bo‘lgan Arslon Bob uch yuz yoshga kirib, dunyodagi o‘ttiz uch xil din bilan tanishib, shular orasidan islom dinini tanlagan ekan. Payg‘ambar (s.a.v.) shundan so‘ng omonatini Arslon Bobga topshirib, ko‘ngillari tinchigach, Olloh huzuriga yo‘l olgan ekan. Oradan 500 yil o‘tganida hazrati Arslon Bob cho‘lda ketayotib yetti yoshli Ahmad Yassaviyni uchratgan. Go‘dak Ahmad avliyo Arslon Bobni tanib: ”Ustoz, mening omonatimni bering!”,- deb so‘ragan ekan.¹
Piri Turkiston 63 yoshida yer ostiga kirishi sababini quyidagicha izohlaydi :
Piri mug‘on Haq Mustafo beshak, biling,
Qayda borsang vasfin aytyib, ta’zim qiling.
Durud aytib, Mustafog‘a ummat bo‘ling,
Ul sababdin oltmish uchda kirdim yerga.
Yuqoridagi rivoyatdan ko‘rinadiki, Xoja Ahmad Yassaviy ikki olam sarvari Muhammad (s.a.v.)ga kuchli muhabbat qo‘ygan va u kishi vafot etgan 63 yoshga kirgandan so‘ng yer yuzida yashashni istamagan. Shunday bo‘lsa-da, muridlarini haq yo‘lida tarbiyalashdan to‘xtamagan.
Xojai Turkiston Ahmad Yassaviy dunyo go‘zalligi va molidan kechgan, o‘z nafsini yenggan, ich-u tashi “tohir” bo‘lgan, ma’rifatullohga erishgan murshid sifatida hamda Qur’oni karim oyatlarini she’riy yo‘l bilan xalqqa yetkizgan shoir sifatida o‘zbek tasavvuf adabiyotida alohida o‘ringa egadir. Sababi, zamonlar o‘zgarsa-da, ilohiy kalomning parchasi bo‘lgan ushbu hikmatlar o‘z ahamiyatini yo‘qotmadi. Ular bugungi kunimiz uchun ham birdek qadrli va ahamiyatli.

1^ Nasafiy. Xoja Ahmad YAssaviy. T:.G‘afur G‘ulom nommidagiAdabiyot va san’at nashriyoti.1993. 4-bet.