Pensiya ishi darslik i-qism toshkent-2020 Rustamov D. R., Tursunov J. P., Beknazarov Z. E

2.2. “Avlodlar birdamligi”ga asoslangan qayta taqsimlovchi model
O‘zbekistonda pensiya ta’minoti tizimining tashkiliy jihatdan ikki shakli mavjud.

1. 
   Fuqarolarning birdamlashgan davlat pensiya ta’minoti. Ushbu tizimning mohiyati shundaki, ijtimoiy sug‘urta asosidagi pensiya tizimi “avlodlar birdamligi” printsipiga asoslangan “taqsimlanuvchi” elementlardan tarkib topgan bo‘lib, bunda ish beruvchilar va ishlovchilar Pensiya jamg‘armasiga majburiy to‘lov va badallarni to‘lab boradi, shakllangan mablag‘lar hisobidan pensionerlarga pensiyalar to‘lab boriladi va bu jarayon uzluksiz davom etadi. Masalan, T avlod pensiyaga chiqdi, uning uchun T+1 avlod pensiya to‘laydi, T+1 uchun esa T+2 va hokazo. Demak, hech qanday fond yaratilmaydi. Hech kim o‘zi uchun to‘lamaydi. Kim pensiya fondiga ajratma o‘tkazayotgan bo‘lsa, demakki, u o‘zidan oldin pensiyaga chiqqan fuqaro pensiyasi mablag‘ining manbai bo‘lib qoladi.
   

O‘zbekiston Respublikasining 1993 yil 3 sentyabrdagi “Fuqarolarning davlat pensiya ta’minoti to‘g‘risida”gi Qonuniga ko‘ra ushbu tizim bo‘yicha davlat pensiyalarining yoshga doir pensiya, nogironlik pensiyasi, boquvchisini yo‘qotganlik pensiyasi kabi turlari mavjud. Fuqarolar yoshga doir pensiya olish huquqiga: erkaklar – 60 yoshga to‘lganda va ish stajlari kamida 25 yil bo‘lgan taqdirda; ayollar – 55 yoshga to‘lganda va ish stajlari kamida 20 yil bo‘lgan taqdirda ega bo‘ladilar. Lekin fuqarolar pensiya olish huquqiga ularning haqiqatda ishlagan ish staji kamida 7 yil bo‘lganda ega bo‘ladilar, ya’ni fuqarolar kamida 7 yil Pensiya jamg‘armasiga sug‘urta badali to‘lagan bo‘lishlari kerak.
Pensiyaning miqdori fuqaroning o‘rtacha oylik ish haqi miqdoriga bog‘liq bo‘ladi. O‘rtacha ish haqi ishdagi mavjud tanaffuslardan qat’i nazar, fuqaroning pensiya olish uchun murojaat qilgandan oldingi oxirgi o‘n yillik mehnat faoliyati davomidagi fuqaro tomonidan tanlangan ketma-ket keluvchi besh yildagi umumiy ish haqi hisobidan olinib, tuzatish koeffitsientlari inobatga olingan holda hisoblangan yig‘indini 60 (5 yildagi oylar soni)ga bo‘lish orqali hisoblab chiqariladi. Agar fuqaroning ish staji umuman bo‘lmasa yoki 7 yildan kam bo‘lsa, bunday hollarda ayollarga 60 yoshga va erkaklarga 65 yoshga to‘lganda yoshga doir nafaqa tayinlanishi mumkin. Uning miqdori bugungi kunda 179 755 so‘mni tashkil qiladi.
Avlodlar birdamligiga asoslangan davlat pensiya ta’minoti bo‘yicha: harbiy xizmatchilarning, ichki ishlar organlarining boshliqlar va oddiy xodimlar tarkibidan bo‘lgan shaxslarining, sudyalarning va prokuratura organlari darajali unvonlarga (harbiy unvonlarga) ega bo‘lgan xodimlarining pensiya ta’minoti; imtiyozli shartlardagi pensiyalar; yoshidan qat’iy nazar imtiyozli pensiya olish huquqi; umumiy belgilangan yoshni 1, 5 va 10 yilga qisqartirilgan holda imtiyozli pensiya olish huquqi; liliputlar va pakanalarga pensiyalar; yoshga doir pensiyalarni muddatidan oldin tayinlash; pensiyalarni va ish haqini hisoblab chiqish tartibi; pensiyalarga ustama haqlar; boshqa davlatlardan ko‘chib kelgan fuqarolarga pensiyalar hisoblab chiqarish; chet elda ishlangan davr uchun ish haqini hisoblab chiqarish; pensiyalarni qayta hisoblash va to‘lash tartiblari O‘zbekiston Respublikasining 1993 yil 3 sentyabrdagi “Fuqarolarning davlat pensiya ta’minoti to‘g‘risida”gi Qonuni, O‘zbekiston Respublikasi Vazirlar Mahkamasining 2011 yil 8 sentyabrdagi “Davlat pensiyalarini tayinlash va to‘lash tartibini yanada takomillashtirishga yo‘naltirilgan normativ-huquqiy hujjatlarni tasdiqlash to‘g‘risida”gi 252-sonli Qarori va boshqa qonun hujjatlari¹³ asosida amalga oshiriladi.

2. 
   Jamg‘arib boriladigan pensiya ta’minoti.
   

O‘zbekistonda pensiya ta’minotining har ikkala tizimi ham pensionerlarning turmush farovonligini yanada oshirish uchun shartsharoitlar yaratishga qaratilgan.