O‘zbekiston respublikasining fuqarolik protsessual kodeksi I bo‘lim. Umumiy qoidalar 1-bob. Asosiy qoidalar

99-modda. Ekspertizaning ekspertlar komissiyasi tomonidan o‘tkazilishi
Ekspertiza bir xil (komissiyaviy ekspertiza) yoki turli xil (kompleks ekspertiza) sud-ekspert
ihtisosligidagi bir necha ekspert tomonidan o‘tkazilishi mumkin.
Ekspertizaning ekspertlar komissiyasi tomonidan o‘tkazilishi ekspertizani tayinlagan sud yoki
mazkur ekspertizaning o‘tkazilishini tashkil etuvchi davlat sud-ekspertiza muassasasi yoxud boshqa
korxona, muassasa, tashkilot rahbari tomonidan belgilanadi.
Ekspertizani o‘tkazish topshirilgan ekspertlar komissiyasi o‘z oldiga qo‘yilgan masalalarni hal
etish zarurligidan kelib chiqib, o‘tkaziladigan tekshirishlarning maqsadi, ketma-ketligi va hajmini
kelishib oladi.

---

Ekspertizani o‘tkazish topshirilgan ekspertlar komissiyasi tarkibidagi har bir ekspert
tekshirishlarni mustaqil va alohida o‘tkazadi, shaxsan o‘zi olgan va komissiyaning boshqa a’zolari
tomonidan olingan natijalarni baholaydi hamda qo‘yilgan savollar yuzasidan o‘z maxsus bilimlari
doirasida fikrlarini shakllantiradi.
Tekshirishlarning ekspertlar komissiyasi tarkibiga kiritilmagan shaxslar tomonidan to‘liq yoki
qisman o‘tkazilishiga yo‘l qo‘yilmaydi.
100-modda. Komissiyaviy ekspertiza
Komissiyaviy ekspertiza o‘tkazilayotganda ekspertlarning har biri tekshirishlarni to‘liq hajmda
o‘tkazadi va ular olingan natijalarni birgalikda tahlil qiladi. Ekspertlar umumiy fikrga kelganidan
so‘ng birgalikdagi xulosani yoki xulosa berishning imkoni yo‘qligi to‘g‘risidagi dalolatnomani tuzadi
va imzolaydi.
Ekspertlar o‘rtasida kelishmovchiliklar yuzaga kelgan taqdirda, ularning har biri
kelishmovchiliklarni keltirib chiqargan barcha yoki ayrim masalalar bo‘yicha alohida xulosa beradi.
101-modda. Kompleks ekspertiza
Kompleks ekspertiza ish uchun ahamiyatga ega bo‘lgan holatlarni turli bilim sohalaridan
foydalangan holda bir nechta tekshirish o‘tkazish yo‘li bilangina aniqlash mumkin bo‘lgan hollarda
tayinlanadi.
Kompleks ekspertizani o‘tkazishda ekspertlarning har biri o‘z vakolati doirasida tekshirishlar
olib boradi. Kompleks ekspertizaning xulosasida ekspertlarning har biri qaysi tekshirishlarni va
qancha hajmda olib borganligi, qaysi faktlarni shaxsan o‘zi aniqlaganligi hamda qanday fikrlarga
kelganligi ko‘rsatiladi. Ekspertlarning har biri xulosaning o‘z tekshirishlari bayon etilgan qismini
imzolaydi va ular uchun javobgar bo‘ladi.
Umumiy fikrni (fikrlarni) olingan natijalarni baholashga va ushbu fikrni (fikrlarni)
shakllantirishga vakolatli bo‘lgan ekspertlar chiqaradi. Agar ekspertlardan birining (alohida
ekspertlarning) aniqlagan faktlari ekspertlar komissiyasi yakuniy fikrining yoki uning bir qismining
asosi sifatida olingan bo‘lsa, bu haqda xulosada ko‘rsatilishi kerak.
Ekspertlar o‘rtasida kelishmovchiliklar yuzaga kelgan taqdirda, ularning har biri
kelishmovchiliklarni keltirib chiqargan barcha yoki ayrim masalalar bo‘yicha alohida xulosa beradi.
Agar kompleks ekspertizani o‘tkazish davlat sud-ekspertiza muassasasiga topshirilgan bo‘lsa,
u holda ushbu ekspertizani tashkil etish uning rahbari zimmasiga yuklatiladi.