O‘zbekiston respublikasi oliy va o‘rta maxsus ta’lim vazirligi o‘rta maxsus kasb-hunar ta’limi markazi

VI BOB. TOPOGRAFIK TUSHUNCHALAR  
VA TURISTIK TEXNIKA BO‘YICHA  
MUSOBAQALAR O‘TKAZISH
6.1. Topografik bilimlar haqida tushunchalar
Sayohatlar jarayonida va umuman atrof-muhitni yaxshi 
bilish, tabiatni kuzatish hamda ular bilan bevosita bog‘liq 
bo‘lgan voqealar, hodisalar, faoliyatlarni anglash muhim 
ahamiyatga egadir. Bu sohada umumta’lim maktablari, o‘rta 
maxsus ta’lim muassasalarida o‘qitiladigan geografiya, tarix, 
adabiyot va boshqa fanlar aniq ma’lumotlar beradi.
Mustaqillik yillari davrida “Alpomish” va “Barchinoy” 
maxsus testlari talablari tarkibida sayr-sayohatlar aholining 
yoshiga qarab normativlar berilganligi hayotiy zaruriyatdir. 
Uning me’yoriy talablarini bajarishda barcha amaliy faoliyatlar 
bilan bir qatorda nazariy jihatdan tegishli bilim hamda malakaga 
ega bo‘lish ham talab etiladi. Ya’ni, sayyohatchilar yo‘lni 
(marshrut) tanlash, chizmalar (sxema) tayyorlash, xaritani 
o‘qish, ulardagi shartli belgilar haqida tushunchalarga ega 
bo‘lishi kerak. Shu sababdan sayohatlarga tayyorgarlik va ularni 
maqsaddagidek amalga oshirish uchun barcha ishtirokchilar 
topografik bilim va tushunchalarga ega bo‘lishlari shart.
Ular bevosita maxsus (seminar) mashg‘ulotlar jarayonida va 
mustaqil ravishda o‘rganiladi. Sayohatlar davomida topografik 
tushunchalar va bilimlar amaliy jihatdan mustahkamlab boriladi.