“O’zbekistonning pragmatik faol tashqi siyosiy va iqtisodiy diplomatiyasi”

Iqtisodiy diplomatiya
Iqtisodiy diplomatiya – davlat tashqi siyosatining elementlaridan biri, davlatning iqtisodiy manfaatlarini xalqaro darajada himoya qilishga qaratilgan o’ziga xos diplomatik faoliyat. Aniqroq ta’rifga ko’ra, iqtisodiy diplomatiya – bu an’anaviy va zamonaviy diplomatiya vositalaridan foydalangan holda, xalqaro maydonda milliy iqtisodiy manfaatlarni himoya qilish uchun davlat, jamoat va ishbilarmon doiralarning birgalikdagi faoliyati.
Iqtisodiy diplomatiya – jahon iqtisodiy maydonida milliy iqtisodiy manfaatlarni ro’yobga chiqarishga va iqtisodiy xavfsizlikni diplomatik usullar bilan himoya qilishga qaratilgan faoliyat. Iqtisodiy diplomatiyaning asosiy maqsadi mamlakatning iqtisodiy rivojlanishi va xalqaro maydonda uning raqobatbardoshligini oshirishdir.
O’zbekiston iqtisodiy diplomatiyasi ham o’ziga xos ko’rinishga ega va u ayniqsa, so’nggi yillarda izchillik bilan rivojlanib bormoqda. O’zbekistonning Jahon Savdo Tashkilotiga a’zo bo’lishi uchun uzoq vaqtdan beri davom etayotgan sa’y-harakatlari va unga bog’liq rejalarida ham iqtisodiy diplomatiya asosiy o’rinni egallaydi.
Shuningdek, joriy yil 31-avgustdan 4-sentabrgacha o’tkazilgan Islom taraqqiyot banki guruhi yillik anjumanining aynan Toshkentda o’tkazilishi ham O’zbekiston olib borayotgan izchil iqtisodiy diplomatiyaning natijasidir. Iqtisodiyotning strategik tarmoqlarida yirik infratuzilma va ijtimoiy ahamiyatga ega loyihalarni moliyalashtiruvchi yirik bank hisoblanmish Islom taraqqiyot bankining yirik tadbirlar va loyihalarda O’zbekistonga ishonch bildirishi o’ta muhim ahamiyat kasb etadi.
O’zbekiston Prezidenti Shavkat Mirziyoyevning joriy yil 15-16-iyul kunlari Toshkentda bo’lib o’tgan “Markaziy va Janubiy Osiyo: mintaqaviy bog’liqlik. Tahdidlar va imkoniyatlar” mavzusidagi xalqaro konferensiyada mintaqalar o’rtasidagi munosabatlarda savdo-iqtisodiy aloqalarni rivojlantirish va o’zaro sarmoyalarni ko’paytirishni ustuvor vazifa deb atagani ham e’tiborga molikdir. Uchrashuvda Shavkat Mirziyoyev ikki mintaqa davlatlari o’rtasida investitsiyaviy hamkorlik va kooperatsiyani chuqurlashtirish, iqtisodiy aloqalarni kengaytirish bo’yicha yillik mintaqalararo forum tashkil qilishni taklif etishi O’zbekiston iqtisodiy diplomatiyasini kelgusida bu yo’nalishda ham jadal ishlashini anglatadi.