O‘zbekiston tarixi

Qopchur, qubchur – uy hayvonlari uchun olingan soliq turi. 1235 yili O‘qtoy qoon tomonidan joriy etilgan. Qopchur solig‘ining miqdori yuz bosh hayvondan birini, ba’zan qirqdan birini tashkil etgan. Ushbu soliq turi dastlab ko‘chmanchi chorvador qabilalardan, keyinchalik esa, o‘troq aholidan ham undiriladigan bo‘lgan.

Qoraunos – XIII-XIV asrlarda Ettisuv va SHarqiy Turkiston mo‘g‘ullari Movarounnahr aholisini shunday atashgan. Qoraunas aralashgan, chatishgan, duragay, metis degan so‘zlarga ma’nodosh.

Qoraqurum – O‘rxun daryosi (Mo‘g‘uliston) bo‘yidagi shahar. CHingizxon va 1230-1260 yillarda O‘gadayxon, Guyukxon va Manguxon davrida mo‘g‘ullar imperiyasining poytaxti. 1380 yilda shahar Xitoy qo‘shinlari tomonidan vayron qilingan.

G‘oziy – islom dini uchun g‘ayri dinlarga qarshi muqaddas urush-g‘azovot ishtirokchisi. SHariatga ko‘ra, bunday urushda oti va qurol-yarog‘i bor har bir musulmon erkak qatnashishi shart bo‘lgan. Kambag‘allar, qullar, nogiron va keksalar bundan ozod etilgan.

G‘ul – 1) o‘rta asrlarda turkiy xalqlar va mo‘g‘ullar qo‘shinining markazida va qanotlar oldida, hukmdor huzurida turuvchi maxsus harbiy qism. Arabcha qalb deyilgan; 2) bandilarning oyoq va bo‘yniga kiygizib qo‘yiladigan jazolash asbobi, kishan.

G‘ulomlar – 1) o‘rta asrlarda musulmon mamlakatlaridagi qullar.

2) Abbosiylar xalifaligi davrida, Ma’mun hukmronligi davrida (813-833) chet ellardan sotib olingan yosh qullardan tuzilgan otliq askarlar gvardiyasi.

3) o‘rta asrlarda boshqa musulmon davlatlarida ham saroy gvardiyasi askarlari g‘ulomlar deb atalgan.