O‘zbekiston respublikasining fuqarolik protsessual kodeksi I bo‘lim. Umumiy qoidalar 1-bob. Asosiy qoidalar

453-modda. Ijro varaqasini ijroga taqdim etishning o‘tkazib yuborilgan muddatini tiklash
Ijro varaqasini ijroga taqdim etishning o‘tkazib yuborilgan muddati, agar qonunda boshqacha
qoida belgilanmagan bo‘lsa, sud uzrli deb topgan sabablarga ko‘ra tiklanishi mumkin.
O‘tkazib yuborilgan muddatni tiklash to‘g‘risidagi ariza sud hujjatini chiqargan sudga yoki u
ijro etiladigan joydagi sudga beriladi. Ariza sudga kelib tushgan kundan e’tiboran o‘n kun ichida
sud majlisida, ishda ishtirok etuvchi shaxslarni xabardor qilgan holda ko‘riladi, biroq bu shaxslarning
kelmaganligi o‘tkazib yuborilgan muddatni tiklash to‘g‘risidagi masalani hal qilish uchun to‘sqinlik
qilmaydi.
Arizani ko‘rib chiqish natijalari bo‘yicha ajrim chiqarilib, u undiruvchi va qarzdorga yuboriladi.
O‘tkazib yuborilgan muddatni tiklash rad qilinganligi ustidan xususiy shikoyat (protest)
berilishi mumkin.
454-modda. Hal qiluv qarorining ijrosini kechiktirish yoki uning bo‘lib-bo‘lib ijro etilishi,
uni ijro etish usuli va tartibini o‘zgartirish
Sud hujjatining ijrosini qiyinlashtiradigan obyektiv holatlar mavjud bo‘lgan taqdirda, sud
undiruvchining, qarzdorning yoki davlat ijrochisining arizasiga binoan hal qiluv qarorining ijrosini
kechiktirishga yoxud uning bo‘lib-bo‘lib ijro etilishiga yo‘l qo‘yishga, uni ijro etish usuli va tartibini
o‘zgartirishga haqli.
Agar vakolatli davlat organining qarorida yoki taraflarning kelishuvida boshqacha qoida
nazarda tutilmagan bo‘lsa, sud hujjatining ijrosini kechiktirish yoxud bo‘lib-bo‘lib ijro etish uchun
ko‘pi bilan bir yil muddat berilishi mumkin.
Qarzdorga sud hujjatining ijrosini kechiktirish yoki uning bo‘lib-bo‘lib ijro etilishiga yo‘l qo‘yish
chog‘ida, sud ushbu Kodeksning 
9-bobida 
nazarda tutilgan tartibda uning ijrosini ta’minlash
choralarini ko‘rishi mumkin.
Sud hujjatining ijrosini kechiktirish yoki uni bo‘lib-bo‘lib ijro etish, uni ijro etish usuli va tartibini
o‘zgartirish haqidagi ariza kelib tushgan kundan e’tiboran o‘n kunlik muddatda sud tomonidan
ko‘riladi.
Arizani ko‘rish natijalari bo‘yicha ajrim chiqarilib, uning ko‘chirma nusxasi undiruvchiga,
qarzdorga, shuningdek sud hujjatining ijrosi davlat ijrochisining ish yurituvida bo‘lgan taqdirda,
davlat ijrochisiga yuboriladi.
Ajrim ustidan ushbu Kodeksda belgilangan tartibda shikoyat qilinishi (protest keltirilishi)
mumkin.