O‘zbekiston respublikasining fuqarolik protsessual kodeksi I bo‘lim. Umumiy qoidalar 1-bob. Asosiy qoidalar

336-modda. Hujjatni saqlovchiga nisbatan da’vo taqdim etmaslik oqibatlari
Agar arizachi ommaviy axborot vositalarida e’lon qilingan kundan e’tiboran uch oylik muddat
o‘tguniga qadar hujjatni saqlovchiga nisbatan da’vo taqdim etmasa, sudya ushbu Kodeksning 
332-
moddasiga 
muvofiq ko‘rilgan choralar o‘z kuchini yo‘qotganligi to‘g‘risida ajrim chiqaradi va hujjat
bergan muassasani bu haqda xabardor qiladi. Hujjatni saqlovchi bunday choralar ko‘rilishi
natijasida o‘ziga yetkazilgan zararni arizachidan undirish huquqiga ega.
337-modda. Ishni ko‘rib chiqishga tayinlash
Agar ommaviy axborot vositalarida e’lon qilingan kundan e’tiboran uch oylik muddat
o‘tguniga qadar hujjatni saqlovchidan ariza kelib tushmasa, sud ishni ko‘rib chiqishga tayinlaydi.
Ish ko‘rib chiqiladigan kun to‘g‘risida arizachi ham, hujjatni bergan muassasa ham xabardor
qilinadi. Biroq ularning kelmaganligi ishni ko‘rib chiqishga to‘sqinlik qilmaydi.
338-modda. Ishni hal qilish
Ishni ko‘rib chiqqach, sud hal qiluv qarori chiqaradi. Sud arizani qanoatlantirgan taqdirda hal
qiluv qarorida taqdim etuvchiga deb berilgan yo‘qolgan hujjat haqiqiy emasligini ko‘rsatadi. Bu hal
qiluv qarori arizachiga omonatni yoki haqiqiy emas deb topilgan hujjat o‘rniga yangisini berish
uchun asos bo‘ladi.
339-modda. Hujjatni saqlovchining asossiz boyish to‘g‘risida da’vo taqdim etish huquqi
O‘zining ushbu hujjatga bo‘lgan huquqlari to‘g‘risida biror sabab bilan o‘z vaqtida arz
qilmagan hujjatni saqlovchi yo‘qolgan hujjat o‘rniga yangisini olish huquqi berilgan shaxsga
nisbatan asossiz boyish to‘g‘risida da’vo taqdim etishi mumkin. Bunday da’vo hal qiluv qarori
qonuniy kuchga kirganidan keyingina sudga taqdim etilishi mumkin.
37-bob. Yo‘qolgan sud ishini yuritishni tiklash
340-modda. Yo‘qolgan sud ishini yuritishni tiklash
Yo‘qolgan sud ishini yuritish sud tomonidan ishda ishtirok etuvchi shaxslarning, prokurorning
arizasiga binoan, shuningdek sudning tashabbusiga ko‘ra tiklanishi mumkin.
Yo‘qolgan sud ishini yuritish to‘liq yoki uning sud fikriga ko‘ra tiklanishi zarur bo‘lgan qismi
tiklanadi. Sudning hal qiluv qarori yoki ish yuritishni tugatish to‘g‘risidagi ajrimi, agar ular ish
yuzasidan chiqarilgan bo‘lsa, tiklanishi shart.
Arizachi yo‘qolgan sud ishini yuritishni tiklash to‘g‘risidagi ishni ko‘rib chiqishda sud
tomonidan qilingan sud xarajatlarini to‘lashdan ozod etiladi. Bila turib yolg‘on ariza berilganda sud
xarajatlari arizachidan undirib olinadi.