O‘zbekiston respublikasi xalq ta’limi vazirligi respublika ta’lim markazi umumiy o‘rta ta’limning adabiyot fanidan davlat ta’lim standarti va o‘quv dasturi toshkent-2017

18-19-mavzu. Nodira. G‘azallar. (2 soat, A2+: 4 soat))

Nodiraning hayoti va ijodi haqida qisqacha ma’lumot. Nodira g‘azallarida hijron va ayriliq ohanglari. Ularning badiiy yetukligi, g‘azallarda ayol tuyg‘ularining ifodalanishi. “Doda keldim...”, “Vasl uyin obod qildim...”, “Kel dahrni imtihon etib ket...” g‘azallarining tahlili.

O‘quvchilar sinfda va mustaqil o‘qishlari, yod olishlari lozim bo‘lgan asarlar:

Lutfiy. G‘azal va tuyuqlar.

Alisher Navoiy. G‘azal va qit’alar.

Nodira. G‘azallar.

3. 
   XX asr o‘zbek adabiyoti
   

(23 soat, A2+: 25 soat )
20-21-mavzu. G‘afur G‘ulom. “Sog‘inish”, “Vaqt”, “Bilib qo‘yki, seni Vatan kutadi” she’rlari. (2 soat, A2+: 4 soat)

G‘afur G‘ulomning XX asr o‘zbek she’riyatida tutgan o‘rni.

“Sog‘inish” she’rida otaga xos sog‘inch tuyg‘usining tiniq va jozibali ifodalanishi. Lirik qahramon tabiatida milliy o‘ziga xoslikning bo‘rtib ko‘rinishi. She’rda yaxshilikka, ezgulikka, ertangi kunga ishonch tuyg‘ulari falsafiy tasvirlanishi. “Vaqt” she’rida umr falsafasi, hayotning har bir daqiqasini qadrlab va iz qoldirib yashashga da’vatning yuksak poetik shaklda ifodalanishi. “Bilib qo‘yki, seni Vatan kutadi” she’rida barkamol yoshlarni Vatan kutayotganligini, ularning Vatani oldidagi mas’uliyati shoirona mahorat bilan tasvirlanishi. Shoir she’rlarida so‘z qo‘llash san’ati.

22-24-mavzu. M. Shayxzoda. “Jaloliddin Manguberdi” dramasi (3 соат, А2+: 5 соат).

Shayxzodaning o‘zbek dramaturgiyasi taraqqiyotida tutgan o‘rni.

“Jaloliddin Manguberdi” dramasi o‘zbek adabiyoti dramaturgiyasining yetuk namunasi sifatida. Asarda mo`g`il istilochilariga qarshi kurashgan xalq qahramoni Jaloliddin Manguberdi obrazi va unga xos bo`lgan vatanparvarlik sifatlarining tasviri. Asar qahramoni haqidagi tarixiy haqiqat va badiiy to‘qimaning o‘zaro munosabati. Dramadagi falsafiy ruh va til jozibadorligi.

Nazariy ma’lumot. Drama.

Mavzu. Hamza Hakimzoda Niyoziy. “Zaharli hayot yoxud ishq qurbonlari” dramasi. (A2+: 4 soat)

Hamzaning o‘zbek milliy dramaturgiyasi shakllanishi va taraqqiy etishiga qo‘shgan hissasi. XX asr boshida yaratilgan sahna asarlarida ma’rifatparvarlik, milliy ma’naviyat va axloq, dunyoviy tafakkur targ‘ibining markaziy o‘ringa chiqishi. “Zaharli hayot yoxud ishq qurbonlari” dramasining o‘z davri dramatik asarlari bilan g‘oyaviy va badiiy aloqadorligi. Dramaning yaratilishiga turtki bo‘lgan ijtimoiy-ma’naviy muhit. Asarning markaziy qahramonlari Mahmudxon va Maryamxonning mazkur muhitga munosabati. Asarda otalar va bolalar muammosi tahlili. Dramaning badiiy xususiyatlari. Asarning bugungi kundagi ahamiyati.