O‘zbekiston respublikasi oliy va o‘rta maxsus ta’lim vazirligi o‘rta maxsus, kasb-xunar ta’lim markazi

4.2. Ohorlash moddalari
Ohorlash moddalari kerakli xususiyatlar bilan birga ba’zi 
qo‘shimcha xususiyatlarga ham ega bo‘lishi kerak. Ohorning 
plyonka hosil qilish xususiyati hisobiga ipning tashqi yuzasi yupqa 
plyonka bilan qoplanib, uning silliq bo‘lishini ta’minlaydi. Ipni 
qoplagan plyonka nafaqat ipdan chiqib turgan tolalarni ip o‘zagiga 
jipslashtirish, shuningdek, ipning to‘quvchilik jarayonidagi ko‘p 
sonli ishqalanishlarga chidamliligini ta’minlashi hamda to‘kilib 
ketmasligi kerak. Yupqa plyonka yetarlicha egiluvchan bo‘lishligi 
talab etilib, u ip dastgoh anjomlaridan o‘tishida (lamel, gula, tig‘) va 
xomuza hosil qilish jarayonidagi deformatsiyalarga chidamli bo‘lishi 
kerak.
Tanda iplarni sifatli ohorlash, ip uzilishlarini kamaytirish 
va to‘quvchilik jarayonining samarali kechishi uchun ohorlash 
moddalariga quyidagi talablar qo‘yiladi:
1)  tarkibida yopishqoq moddalar bo‘lishi kerak, ma’lum 
miqdorda quyuq bo‘lishi va qurigandan keyin ipning sirtida 
plyonka hosil qiluvchi xossaga ega bo‘lishi;
2)  ipni silliq qilish uchun bir me’yorda ohorlash;
3)  tayyor ohor rangsiz, tiniq modda bo‘lishi;
4)  to‘quv dastgohida tanda iplaridan ohor uqalanib tushib 
ketmasligi;
5)  ohor to‘qimadan tez va yengil tozalanishi;
6)  ohorga ishlatiladigan xomashyolar arzon bo‘lishi va tanqis 
bo‘lmasligi;
7)  ohor bilan ip kimyoviy reaksiyaga kirishmasligi kerak.
Ohor tayyorlashda quyidagi moddalar ishlatiladi: yelimlovchi 
moddalar, parchalovchilar, yumshatgichlar, antistatiklar, gigroskopik 
moddalar, mog‘orlatmovchilar (antiseptiklar), erituvchi moddalar, 
ko‘pik yo‘qotuvchi moddalar.