O’zbekiston respublikasi oliy va o’rta maxsus ta’lim vazirligi islom karimov nomidagi toshkent davlat texnika universiteti

Умумий маълумотлар. Лента-канатли конвейерлар ичида энг кўп тарқалган тури иккита тортувчи канат ва унинг устида эркин ётувчи лентадан иборат бўлган конвейерлардир.
Лента-канатли конвейерлар уклонларда, қия стволларда, узун ва тўғри линияли ташиш штреклари ва квершлагларида, ҳамда руда ва кўмир каръерларери ер юзасидаги транспорт мажмуаларида ишлатилади. Ҳозирги кунда дунёда 150 дан ортиқ шундай конвейерлар ишлатилмоқда. Бу конвейерларнинг унумдорлиги типоразмерига қараб 500 дан 4000 т/соат гача, ишчи органининг тезлиги 2 дан 7 м/секундгача етади.
Лента-канатли конвейерлар одатда узун трассаларда ишлатилиб, уларнинг узунлиги 1000 м дан 30000 м гача етади. Трассанинг қиялик бурчаги 3⁰ дан 12⁰ гача бўлиши мумкин. Лентасининг эни 766 мм дан 1520 мм гача, тортувчи канатлар диаметри 29,5 мм дан 58,0 мм гача. Юритувчи шкивлар диаметри 2000 мм дан 4500 мм гача, юритма қуввати 200 дан 6000 кВт гача бўлади.
Лента-канатли конвейерларнинг асосий афзалликларига қуйидагилар киради: битта конвейер ставини катта узунликка ўрнатиш имкониятининг мавжудлиги, лентасининг хизмат муддати узоқлиги (10 йил ва ундан ошиқ), металл сарфининг нисбатан камлиги, ҳаракатга қаршилик коэффициентининг кичиклиги.
Ушбу конвейернинг камчиликларига: юритиш ва таранглаш станцияларининг катта габарит ўлчамлилиги, қияликда ўрнатиш бурчагининг кичиклиги (12-13⁰, мойланмаган канатда 16-17⁰), махсус конструкцияли ленталарни қўллаш зарурлиги, йирик бўлакли юкларни ташиш (300 мм гача) ва унумдорликнинг чегараланганлиги.
Пластинали конвейер деб, занжирли тортиш органидан ва пўлат пластиналардан ташкил топган юк кўтариш юзасидан иборат бўлган конвейерларга айтилади. Занжир унга махкамланган пластиналар билан биргаликда пластинали лента, бир-бирига бириктирилган пластиналар эса тўшама ёки тасма деб аталади. Материални қўзғалмас тарнов бўйлаб судраб ташийдиган куракли конвейерлардан фарқли ўлароқ пластинали конвейерларда материал юк кўтариш юзасида ташилади ва унга нисбатан қўзғалмасдан туради. Шунинг учун ташилиш жараёнида материал майдаланмайди ва едирилмайди.Пластинали лента роликларда харакатланиши сабабли бу конвейерларда харакат қаршилиги ва юк ташиш учун сарфланадиган энергия куракли конвейерларга нисбатан анча кам бўлади.



4-расм. Пластинали конвейернинг принципиал схемаси

Пластинали конвейер (4 – расм) юритувчи 1 ва тарангловчи 5 юлдузчаларни айланиб ўтадиган битта ёки иккита занжир 3 дан иборат. Занжир звеноларига пластина 2 лар маҳкамланади, улар бир – бирига мингашиб (ёпиб) юк кўтарувчи полотнони ҳосил қилади.Тортувчи занжир ёки пластиналарга йўналтирувчилар бўйлаб ғилдираб юрадиган ролик 4 лар маҳкамланади.

Юритувчи станциялар четки 8 ва оралиқ 7 бўлиши мумкин.Тарангловчи станция 6 занжирни таранглашга ҳизмат қилади.
Пластинали конвейерлар катта мустаҳкамлик ва узоқ ишлаш қобилиятига эга ҳамда эгри чизиқли трассада ўрнатилишга бошқа конвейерларга нисбатан осонроқ мосланиши мумкин.
Пластинали конвейерларнинг афзаллиги уларга оралиқ юритма кўйилиши (ўрнатилиши) мумкинлигидадир, бу эса материални амалда ҳар қандай масофага қайта юкламасдан туриб ташиш имкониятини яратади.
Занжир ва пластиналар учун чидамлилиги юқори бўлган пўлат ҳамда уларни ишлаб чиқариш учун замонавий технологияларни қўллаган ҳолда пластинали конвейерларнинг қониқарли бўладиган оғирлик ва эксплуатацион кўрсаткичларига эришиш мумкин.
Пластинали конвейерлар айниқса штрек бўйлаб кўмир ташишда самаралидир. Штреклар одатда қатламлар изогипси бўйлаб ўтилади, шунинг учун улар планда эгри чизиқли бўлиб чиқади. Бундай лаҳимларда бошқа турдаги, масалан, тўғри чизиқли трассада ўрнатиладиган Лентали конвейерларни қўллаш қийинлашади.
Ҳисоб-китобларга кўра пластинали конвейерларнинг унумдорлиги таҳминан 200 т/соатдан бошлаб кўпайиши билан, уларни штрекларда қўллашнинг иқтисодий самарадорлиги ошиб боради. Шу билан биргаликда улар нафақат эгри чизиқли, балки тўғри чизиқли штрекларда ҳам самаралидир.Унумдорлиги 200 т/соат ва узунлиги 400 м бўлган пластинали ва Лентали конвейерларни ишлатишдаги эксплуатацион ҳаражатлар таҳминан бир ҳил.